पहिरोमा ज्यान गुमाउनेको परिवारलाई आर्थिक सहयोग

Avatar आदर्श समाज सम्वाददाता
कार्तिक ६, २०७७

स्याङजा । स्याङ्जाका विभिन्न ठाउँमा पहिरोमा परी ज्यान गुमाएकाको परिवारलाई आर्थिक सहयोग गरिएको छ । वैदेशिक रोजगारीको शिलशिलामा विदेशमा बस्ने नेपालीहरुको सहयोगमा उपलब्ध गराईएको रकम वालिङ नगरपालिका मार्फत पीडित परिवारलाई हस्तान्तरण गरिएको हो ।

बेलायतमा बसोबास गर्दै आएका योगेन्द्रकुमार गैह्रेको पहलमा संकलन गरिएको ३ लाख ५० हजार, पोर्चुगलमा अर्जुन अर्याल र बेलायतमा दामोदर सुबेदीको पहलमा संकलन गरिएको चार लाख ३२ हजार, स्याङ्जा सहयोग समाज वालिङ नगर ईकाई कतारको ५० हजार गरी कूल ८ लाख ३२ हजार हस्तान्तरण नगरपालिकाले जनाएको छ ।

नगर प्रमुख दिलीपप्रताप खाँणले ति परिवारलाई रकम हस्तान्तरण गरे । असोज ८ गते वालिङ १४ तमादीमा एकजना पाहुनासहित एकैघरमा ९ जनाको पहिरोमा पुरिएर ज्यान गएकाको थियो । उनीहरुको परिवारलाई नर्वे, क्यानडा, बेलायत, अष्ट्रेलियामा रहेका नेपालीहरुबाट संकलन गरिएको ३ लाख, सोही घटनामा परेर ज्यान गुमाएकी अर्की महिलाको परिवारलाई २५ हजार र वालिङ ११ पेखुमा गिट्टी निकाल्ने क्रममा पुरिएर मृत्यु भएकाको परिवारलाई २५ हजार गरी कूल तीन लाख ५० हजार हस्तान्तरण गरिएको नगर प्रमुख खाँणले बताए ।

पोर्चुगलमा अर्जुन अर्याल र बेलायतमा दामोदर सुबेदीको पहलमा संकलन गरिएको ४ लाख ३२ हजारबाट मनिषा/भोजराज नेपालीलाई एकलाख ८२ हजार, तमादी पहिरोमा घर पुरिएर विस्थापित भएका चार परिवारलाई प्रतिपरिवार ५० हजारका दरले दुई लाख, कालीगण्डकी ४ विर्घामा ज्यान गुमाएकाको परिवारलाई ५० हजार उपलब्ध गराईएको छ । विभिन्न देशमा रोजगारीका शिलशिलामा रहेर जन्मभूमिप्रति देखाएका सहयोगप्रति उनले धनयवाद दिए । यस्तै, स्याङ्जा सहयोग समाज वालिङ नगर ईकाइ कतारबाट संकलन भएको ५० हजार रकम समाजका कोषाध्यक्ष खगेन्द्र गैह्रेले वालिङ नगरपालिकामार्फत तमादी पहिरोमा परी ज्यान गुमाएका परिवार तथा समाजका अग्निपीडित सदस्य सञ्जय कोईरालालाई राहत उपलब्ध गराएको हो ।