पोखरा । पोखरा महानगरपालिकाको कार्यपालिका बैठक कांग्रेसले बहिष्कार गरेको छ । कोरोनाले कर्मचारीलाई छोपेपछि महानगरले भर्चुअल प्रविधिबाट बैठक बोलाएको थियो । तर कांग्रेसले भर्चुअल बैठक आफुहरुसँग सल्लाह नगरी डाकिएको भन्दै सहभागी नहुने निर्णय गरेको सचेतक रामराज लामिछानेले जानकारी दिए ।

‘सामाजिक दुरी राखेर बैठक बस्न मिल्थ्यो । एक्कासी भर्चुअल भनेर बैठक डाकियो,’ उनले भने, ‘केहि एजेण्डामा हाम्रो विमती छ । त्यही कुरामा विरोध होला भनेर नियतबस भर्चुअल बैठक राखिएको हो ।’ मंगलबारका कुनैपनि निर्णय आफुहरुले नमान्ने लामिछानेले बताए । तर कांग्रेसका एकजना वडाध्यक्ष भने बैठकमा सहभागी थिए । महानगरको एजेण्डाभन्दा फरक बिषय उठाउनका लागि बैठकमा सहभागी भएको उनले बताए । उनले महानगरपालिका प्रणालीमा नचलेको आरोप समेत लगाए । ‘पार्टीले बैठकमै नजान भनेको थियो । अरु एजेण्डामा मेरो पनि बहिष्कार नै हो,’ वडाध्यक्ष जगत पहारीले भने, ‘मैले फेवातालको मापदण्डका बिषयमा कुरा राख्नैपर्ने थियो । त्यसैले सहभागी भएँ ।’

मंगलबारको बैठकमा गण्डकी बहुप्राविधिक शिक्षालय सम्बन्धि कार्यविधि पास भएको छ भने किसानको परिचय वितरणका लागि फाराम भर्दा लाग्ने शुल्क तोकिएको छ । गरिव, भुमिहिन र निम्न बर्गका किसानलाई निशुल्क फाराम भर्न पाउने सुविधा बनाईएको छ भने निर्वाहमुखी किसानलाई १ र २ हजार तथा फार्म स्थापना गर्ने किसानले फाराम भर्दा ५ हजार तिर्नुपर्छ । महानगरको सुविधा लिने किसानले मात्रै यो फाराम भर्नुपर्ने बाध्यता छ । महानगरले केहि समयअघि अनलाईन मार्फत कृषक बर्गीकरणको सुरुवात गरेको थियो ।

यस्तै, प्रारम्भीक वातावरणीय अध्ययन (आइईई) स्विकृत गर्ने कार्यविधि बनाईएको छ भने बालमैत्री वडा घोषणा गर्ने र बालमन्च गठन गर्ने निर्देशिका तयार गरिएको छ । वातावरण तथा प्राकृतिक श्रोतको संरक्षण सम्बन्धमा बनेको विधेयक विधायन समितिमा पठाईएको छ । महानगरले नक्सापास तथा भवन निर्माण मापदण्ड संशोधन गरेको छ । कांग्रेसले बैठक बहिष्कार गरेको बारे महानगरलाई कुनै जानकारी नभएको मेयर मानबहादुर जिसीले बताए । ‘बहिष्कार गर्ने कुरा आधिकारिक रुपमा हामीलाई थाहा भएन । स्थानीय तहमा कोही प्रतिपक्षी भन्ने हुँदैन,’ उनले भने, ‘बहिष्कार नै गर्नुपर्ने कुनै एजेण्डा पनि थिएन । यो कुनै राजनीतिक एजेण्डा होईन ।’ सबै एजेण्डा बहुमतले निर्णय गरिएको हो । ३३ वडामध्ये २२ वडामा सत्तारुढ नेकपाका वडाध्यक्ष छन् भने कांग्रेसका ११ सांसद छन् ।