कोरलामा मन्त्री र सचिवको भ्रमण

Avatar आदर्श समाज सम्वाददाता
असाेज २९, २०७७

पोखरा । मुस्ताङको कोरला स्थित नेपाल र चीनको सीमा क्षेत्रमा मन्त्री र सचिवहरुले भ्रमण गरेका छन् । उत्तरी ७ नाका खोल्ने दुई देशबीच सहमति भैसकेको अवस्थामा कोरला नाकामा भौतिक पूर्वाधार निर्माणको लागि परराष्ट्रमन्त्री प्रदीप ज्ञवाली र उद्योग बाणिज्य तथा आपुर्ति मन्त्री लेखराज भट्टले अवलोकन गरेका हुन् । उनीहरुसँगै मन्त्रालयका सचिवहरु, भन्सार कार्यालयका महानिर्देशक लगायत बुधबार कोरला पुगेका हुन् ।

नाका हेरेपछि परराष्ट्रमन्त्री ज्ञवालीले नाका नजिक भौतिक संरचना निर्माणका लागि तत्कालै बजेट ब्यवस्था गर्ने बताए । भन्सार, अध्यागमन र क्वारेन्टिन तत्कालै बनाउने सरकारी तयारी रहेको उनले सुनाए । यद्यपी सरकारले बजेट विनियोजन भने गरिसकेको छैन ।

चीनतर्फ अत्याधुनिक भौतिक संरचना बनिरहेका बेला नेपालतर्फ अहिलेसमम केही काम भएको छैन । उद्योग, वाणिज्य तथा आपुर्ति मन्त्री भट्टले दुई देशको औद्योगिक माल सामान ओसारपसारका लागि यो नाका महत्वपूर्ण भएको बताए । नाका नजिक आवश्यक संरचना निर्माणका लागि सरकार तयार रहेको उनको भनाई छ ।

सांसद इन्द्रधारा बिष्टका अनुसार चीनतर्फका सडक कालोपत्रे गरिएको छ । नेपालबाट नाकामा भर्खरै ग्राभेल सडक पुगेको छ । यसैलाई लक्षित सरकारले मुस्ताङ र म्याग्दी खण्डको सडक स्तरोन्नतीको काम गरिरहेको छ । यो नाका नुन साँट्ने नाकाको रुपमा परिचित छ । उपल्लो मुस्ताङ र तिब्बतबीच ब्यापार पनि हुँदै आएको छ । पछिल्लो समय ब्यापारिक गतिविधि निकै घटेको छ ।