महेन्द्र माविमा चार कोठे भवन

आदर्श समाज सम्वाददाता
असाेज २७, २०७७

पोखरा । कास्कीको माछापुच्छ्रे गाउँपालिका स्थित लाहाचोकमा रहेको महेन्द्र माविमा चारकोठे पक्की भवन निर्माण थालिएको छ । मंसिरभित्रै काम सक्ने गरी पक्की भवन, शौचालय र खानेपानी ट्यांकी बनाउन थालिएको हो । राष्ट्रिय पुनः निर्माण प्राधिकरण जिल्ला आयोजना कार्यान्वयन इकाईले ९६ लाख लागतमा भवन सहित ३ वटा शौचालय र पानी ट्यांकी निर्माण गरेको विद्यालय ब्यवस्थापन समितिका अध्यक्ष रामप्रसाद अधिकारीले बताए ।

विद्यालयमा अहिले रहेको भवन जीर्ण भएपछि नयाँ भवन बनाउन लागिएको हो । भवन निर्माणको गण्डकी प्रदेशसभा सांसद रामजी बरालले सुरुवात गरे । बरालले समयमै गुणस्तरीय भवन निर्माण सक्न निर्देशन दिए । उनले भौतिक पुर्वाधार र शैक्षिक गुणस्तर बढाएर सामुदायिक विद्यालयमा विद्यार्थीको आकर्षण बढाउनुपर्ने बताए ।

‘विद्यार्थीहरु रहरले बोर्डिङ पढ्न गएका होईनन् । सामुदायिक विद्यालयमा गुणस्तरीय शिक्षा नपाएर हो,’ उनले भने, ‘शिक्षाको गुणस्तर उकास्ने जिम्मेवारी विद्यालयको हो । भौतिक पूर्वाधारमा सरकारले सघाउँछ । पढाई राम्रो भए सहर झरेका विद्यार्थी पनि गाउँमा आउँछन् ।’

बरालले शिक्षालाई सीपमुलक बनाउनुपर्नेमा जोड दिए । जिल्ला समन्वय समिति कास्कीका प्रमुख बैनबहादुर क्षेत्रीका अनुसार कास्कीभरका विद्यालय निर्माणमा चालू बर्षभित्र १० करोड बजेट विनियोजन भएको बताए । माछापुच्छ्रे गाँउपालिकाका अध्यक्ष कर्णबहादुर गुरुङले गाउँपालिकामा भुकम्पले असर गरेको भन्दै अहिले २८ वटा नयाँ योजना कार्यान्वयन भैरहेको जानकारी दिए ।