पोखरा, २१ असाेज । नेपालमा गएको २४ घण्टामा ३ हजार ४ सय ३९ जना कोरोना संक्रमित थपिएका छन् । एकै दिन थपिएको यो संख्या अहिलेसम्मकै उच्च हो ।

स्वास्थ्य तथा जनसंख्या मन्त्रालयको बुधबार नियमित प्रेस ब्रिफिङमा मन्त्रालयका प्रवक्ता प्राडा जागेश्वर गौतमका अनुसार गएको २४ घण्टामा १४ हजार २ सय ९ पीसीआर परीक्षणमा ३ हजार ४ सय ३९ जनामा संक्रमण देखा परेको हो । तीमध्ये १ हजार ६ सय ८४ जना काठमाडौं उपत्यकामा मात्रै हुन् । देशभर कुल संक्रमितको संख्या ९४ हजार २ सय ५३ पुगेको छ । उनीहरुमध्ये ५ सय ७८ जनाको मृत्यु भएको छ । बुधबारमात्रै १५ जनाको मृत्यु भएको हो ।

निकाे हुने कुल ६८ हजार ६ सय ६८ पुगेको छ

यसैगरी, देशभर सक्रिय संक्रमित संख्या बुधबारदेखि २५ हजार नाघेको छ । हाल २५ हजार ७ जना सक्रिय संक्रमित छन् ।

पछिल्लो २४ घण्टामा १ हजार १ सय २९ जना निको भएका छन् । योसहित निको हुनेको कुल संख्या ६८ हजार ६ सय ६८ पुगेको छ ।

उता, गण्डकी प्रदेशमा बुधबारमात्रै ९२ जना संक्रमित थप भए । यो सहित प्रदेशमा कुल संक्रमित संख्या ४ हजार ४ सय १ पुगेको प्रदेश स्वास्थ्य निर्देशनालय गण्डकीले जनाएको छ । तीमध्ये ३६ जनाको ज्यान गइसकेको छ । हालसम्म ३ हजार १ सय ४९ निको भएका छन् । गएको २४ घण्टामा मात्रै ६९ जना निको भएका हुन् ।