मुसहर र सुकुम्बासी बस्तीमा सहयोग

आदर्श समाज सम्वाददाता
असाेज २०, २०७७

पोखरा । बुद्धिष्ट कम्युनिटी लण्डन शाखाकी आमा समूह अध्यक्ष अन्तिम गुरुङको पहलमा नवलपुरको मुसहर नयाँ बस्तीका ६५ घरपरिवारलाई राहत सामग्री वितरण गरिएको छ । दसँै आगमनको पूर्वसन्ध्यामा कावासोती १३, मुसहर बस्तीमा राहत सहयोग वितरण गरिएको हो।

युकेका ४३ जना सहयोगीहरुले १ लाख ६० हजार रुपैयाँ संकलन गरी सो बराबरको चामल, दाल, तेल, नुन राहत वितरण गरिएको हो।

राहत वितरणका प्रमुख अतिथि कावासोती १३ का वडाध्यक्ष विनोद रानामगरले विदेशीभूमिबाट राहत संकलन गरी मुसहर बस्तीमा राहत पठाएकोमा सहयोगीहरुलाई हार्दिक धन्यवाद व्यक्त गरे। मुसहर बस्तीमा भोकमरीको अवस्थामा राहत सामग्री पाउँदा आफूहरु अत्यन्त खुसी भएको कावासोती १३ का वडा सदस्य एवम् नगरपालिका सदस्य कलिया मुसहरको भनाइ थियो।

राहत वितरणका संयोजक बुद्धदर्शन टेलिभिजनका प्रबन्ध निर्देशक रुद्रबहादुर गुरुङले दुःख समस्या परेको बेलामा सहयोग गर्नु मानव धर्म भएको बताए । उनले बुद्धिष्ट कम्युनिटी सेन्टर लण्डनकी आमा समूह अध्यक्ष अन्तिम गुरुङ, अन्य सहयोगीहरु, पोखरा निवासी तमु धिं नेपालका उपाध्यक्ष तथा कास्की आवाजका सम्पादक हुमबहादुर तमुप्रति आभार समेत प्रकट गरे ।

यसैबीच, काठमाडौं सुकुम्बासी बस्तीमा पनि समाजसेवी अन्तिम गुरुङको विशेष पहलमा दसँै राहत सहयोग वितरण गरिएको छ ।

रिम्पोछे मुन्सेल गुरुको विशेष व्यवस्थापन सहयोगमा १ लाख ७० हजार बराबरको चामल, दाल, तेल, नुन वितरण गरिएको हो ।