गण्डकीमा कोरोना संक्रमणबाट ज्यान गुमाउने ३४ पुगे

आदर्श समाज सम्वाददाता
असाेज १८, २०७७

फाइल फोटो ।

पोखरा, १८ असोज । गण्डकी प्रदेशमा थप १ जना कोरोना संक्रमितको मृत्यु भएको छ ।

नवलपुरको विनयत्रिवेणी–२, दुम्कीवासका ३६ वर्षीय पुरुषको शनिबार मृत्यु भएको हो । गण्डकी प्रदेश स्वास्थ्य निर्देशनालयका निर्देशक डा. विनोदविन्दु शर्माका अनुसार यो सहित प्रदेशका कोरोना संक्रमितमध्ये मृत्यु हुनेको कुल संख्या ३४ पुगेको छ ।

असोज १३ मा कोरोना पुष्टि भएपछि उनी असोज १७ गते भरतपुर अस्पतालको आईसीयूमा भर्ना भएका थिए । उनमा श्वासप्रश्वास तथा कलेजोमा समस्या देखिएकोमा उपचारक्रममा मृत्यु भएको हो । नवलपुरमा मात्रै कोरोना संक्रमणका कारण ज्यान गुमाउने ७ जना पुगेका छन् ।

यसैबीच, गण्डकी प्रदेशमा आइतबारमात्र ४३ जना (१ मृत्यु समेत) कोरोना संक्रमित थपिएका छन् । यो सहित कुल संक्रमित संख्या ४ हजार ५९ पुगेको छ ।

तीमध्ये क्षयरोग उपचार केन्द्र पोखरामा भएको परीक्षणमा तनहुँ शुक्लागण्डकीमा कार्यरत ५ जना (चिकित्सक, अनमी, लेखा र प्रशासनमा कार्यरत कर्मचारी, सुरक्षाकर्मीसमेत), लमजुङ सुन्दरबजारका ३, राइनासका १ र दोर्दीका १ गरी ५ जना छन् ।

उता, चितवन मेडिकल कलेजमा भएको परीक्षणमा नवलपुरका मात्रै २६ जना संक्रमित थपिएका छन् । उनीहरु देवचुली, गैँडाकोट, विनयत्रिवेणी, कावासोतीका हुन् ।
यस्तै, तनहुँको व्यासका २ र देवघाटका २ जना छन् । गोरखाको पालुङटारका १, स्याङ्जा कालीगण्डकीका १ र बागलुङ काठेखोलाका १ जना संक्रमित भएका हुन् ।