सुदूरपहाडमा नियमित उडान हुन्छः मन्त्री भट्टराई

rss रासस
असाेज १८, २०७७

बैतडीको पाटन विमानस्थलमा अवतरण गरेको विमानस्थल हेर्न पुगेका स्थानीय बासिन्दा । बैतडीसहित सुदूरपश्चिमको बझाङको चैनपुर, डोटीको दीपायल विमानस्थलको निर्माण सकिएकोले शनिबार परीक्षण उडान गरिएको छ । तस्वीरः विनोद सिंह विष्ट

बैतडी, १७ असोज । संस्कृति, पर्यटन तथा नागरिक उड्डयनमन्त्री योगेश भट्टराईले सुदूरपश्चिमका पहाडी जिल्लामा नियमित उडान हुने बताएका छन् । विमानस्थल निरीक्षण तथा उडान परीक्षणका क्रममा बैतडीको पाटन विमानस्थलमा आयोजित कार्यक्रममा उनले भने, “ नियमित उडानका लागि केही दिनमै तालिका सार्वजनिक गर्छौ ।”

मन्त्री भट्टराईले टर्मिनल भवन, टावरलगायत अन्य भौतिक संरचनाको काम सम्पन्न भएपछि विमानस्थल नियमित रुपमा सञ्चालनमा आउनेछन् भन्दै बैतडीसहित सुदूरपश्चिम पर्यटकीय हिसाबले महत्वपूर्ण गन्तव्य रहेकाले यहाँका विमानस्थलहरु नियमित सञ्चालनमा ल्याउन सके यस क्षेत्रको आर्थिक सम्वृद्धि हुने बताए ।

उनले भने, “पर्यटन प्रर्वद्धनका लागि तीन वटै तहका सरकारको समन्वय सहकार्य आवश्यक पर्छ ।” मन्त्री भट्टराईले बैतडीको पताल भुवनेश्वर गुफालाई पर्यटकीय गन्तव्यका रुपमा विकास गर्नुपर्नेमा जोड दिदैं अबको बाटो विकास र आर्थिक क्रान्तिको हो, यसमा सबैको साथ र सहयोग आवश्यक रहेकाे बताए।

प्रतिनिधिसभा सदस्य दामोदर भण्डारीले सरकारले जनआकांक्षा अनुसार काम गरिरहेको उल्लेख गर्दै मुलुक अब समृद्ध बन्नेतर्फ अगाडि बढेको बताए।

यसैबीच मन्त्री भट्टराईले सुदूरपश्चिम प्रदेशका पहाडी जिल्लाका विमानस्थलको निरीक्षण गरेका गरे। उनले बैतडीको पाटन, बझाङको चैनपुर र डोटीको दीपायल विमानस्थलको निरीक्षण गरेका हुन्। समिट एयरले धनगढीबाट डोटी, बझाङ र बैतडीमा परीक्षण उडान गरेको थियो ।

डोटीको दिपायल बिमानस्थलको धावनमार्ग निरीक्षण गर्दै पर्यटन तथा नागरिक उड्डयनमन्त्री योगेशकुमार भट्टराई तथा संघीय सांसद प्रेमबहादुर आलेमगरसहितको टोली । तस्वीरः विमलबहादुर विष्ट।

धनगढी विमानस्थलका प्रमुख तेजबहादुर बुढथापाका अनुसार परीक्षण उडान सफल भए विमान कम्पनीलाई धनगढीलाई बेस बनाएर पहाडी जिल्लामा नियमित उडान शुरु गर्न आह्वान गरिनेछ । उनले भने, “ विमानस्थल सञ्चालन गर्न ठिक छ भन्ने परीक्षण उडानको रिपोर्ट आएपछि आह्वान गर्छौ ।”

दशकपछि बझाङमा जहाज, नियमित उडानकाे आशा

करिब एक दशकपछि यहाँ पुनः हवाईयातायात सञ्चालन हुने सम्भावना बढेको छ । सरकारका उच्च अधिकारीले शनिबार यहाँको विमानस्थलको निरीक्षण गरेपछि बझाङमा पनि जहाज सञ्चालन हुने सङ्केत देखिएको हो ।

विसं २०६५ देखि बन्द रहेको विमानस्थलमा परीक्षण उडानका क्रममा शनिबार समिट यएरको ट्वीनअटर जहाजले सफल अवतरण गरेको हो । संस्कृित, पर्यटन तथा नागरिक उड्डयनमन्त्री योगेश भट्टराई, अनेरास्ववियुका केन्द्रीय संयोजक ऐन महरलगायत जिल्लाबाट प्रतिनिधिसभामा प्रतिनिधित्व गर्ने सांसदले विमानस्थलको निरीक्षण गरे।

विमानस्थल परीक्षणकै क्रममा रहेको दिपायल विमानस्थलमा निरीक्षण गरी साढे १२ बजे दिपायलबाट बझाङ उडेको जहाज १२ः४५ मा देवल विमानस्थलमा अवतरण भएको हो । जहाजलाई नियमित उडान भर्नका लागि विमानस्थल योग्य छ कि छैन भनेर निरीक्षण गर्नका लागि मन्त्री भट्टराईसहित अन्य नेता र विमानका क्षेत्रीय निर्देशकलगायतको टोली बझाङ पुगेको हो ।

विमानस्थल कालोपत्रको समयभन्दा अघि स्थलगत परीक्षण गरिएको विमानस्थलमा दोस्रोपटक सफल अवतरण गरिएको हो । यसअघि पनि नेपाली सेनाको हेलिकोप्टरमार्फत हवाई निरीक्षण गरिएको थियो । कालोपत्रको काम सम्पन्न भएपछि शनिबार मन्त्री भट्टराईलगायतको टोलीले निरीक्षण गरेको हो ।

निरीक्षणका क्रममा पत्रकारसँग कुराकानी गर्दै मन्त्री भट्टराईले बझाङको विमानस्थलमा दुवैतिरबाट अवतरण गर्न सकिने भएकाले सुदूरपश्चिमका अन्य पहाडी जिल्लाभन्दा सहज रहेको बताए। मन्त्री भट्टराईले भने, “बझाङमा जहाजले उडान भर्ने भएपछि यहाँका अथाह पर्यटकीय सम्भावना बोकेका खप्तड, साइपाललगायत क्षेत्रमा पर्यटकलाई भित्र्याउन सकिन्छ । साथै यहाँका जनताको आयस्रोतमा पनि वृद्धि हुनेछ ।”

यस्तै बझाङ विमानस्थलको निरीक्षणको क्रममा बझाङ पुगेका समिट एयरका क्षेत्रीय निर्देशक सरोजप्रसाद उप्रेतीले बझाङ विमानस्थलमा सफल परीक्षण भएको भन्दै आगामी दिनमा जहाज उडाउनका लागि सरोकारवालाको महत्वपूर्ण भूमिका रहने बताए। बझाङमा नियमित जहाज उडाउने कुरामा आफूहरुले कसरी अगाडि बढ्न सकिन्छ भनेर सल्लाह गर्ने उप्रेतीले बताए।

धनगढी विमानस्थलका प्रमुख तेजबहादुर बुढथापाले भौगोलिक विकटता र जनसङ्ख्याको चाप कम भएका कारण जहाज नियमित उडान हुने कि नहुने भनेर अहिले भन्न नसकिने बताए। उनले भने, “बझाङमा जनसङ्ख्याको चाप कम भएको र जहाज नियमित उडान गर्न निजी जहाज कम्पनीले मान्ने/नमान्ने कुरामा निर्भर गर्छ । बझाङबाट आगामी दिनमा प्रदेश राजधानीको विमानस्थलमा नै जहाज उड्ने र त्यहाँसम्मका लागि यात्रुहरुले रु तीन हजार ५०० देखि रु चार हजारसम्म तिर्नुपर्ने देखिन्छ ।”

विमान सेवा सञ्चालन हुनुपर्ने माग गर्दै पटक–पटक केन्द्रसम्म धाएका यहाँका स्थानीयवासी परीक्षण उडान शुरु भएपछि खुशी भएका छन् । हप्तामा कम्तीमा दुई उडान हुनसके यहाँका बासिन्दालाई राहत हुने र जिल्लाको पर्यटन प्रवद्र्धन हुने उनीहरुको भनाइ छ ।

विसं २०३५ मा कच्ची विमानस्थल निर्माण सम्पन्न भएपछि पहिलोपटक तत्कालीन शाही नेपाल वायुसेवा निगमले साप्ताहिक उडान थालेको यो विमानस्थल विसं २०६५ सम्म सञ्चालनमा थियो । पछिल्लो समय निगमबाहेकका निजी विमान कम्पनीले पनि बझाङबाट नेपालगञ्ज र धनगढीका लागि उडान भर्ने गरेका थिए ।

विसं २०६५ मा बझाङ सदरमुकामसम्म बस चल्न थालेपछि यो विमानस्थलमा कुनै पनि उडान भएका छैनन् । विसं २०६६ मा नेपाल वायुसेवा निगमले बझाङ सदरमुकाममा रहेको आफ्नो कार्यालयसमेत बन्द गरेको थियो ।

बढीजसो बझाङ–नेपालगञ्ज उडान सञ्चालन गर्ने विमान कम्पनीले नेपालगञ्जबाट बझाङ आउने यात्रुको चाप घट्दै गएका कारण उडान बन्द गरेको बताएका थिए । यद्यपि धनगढी–बझाङ उडान सञ्चालन गर्न सके दैनिक दुई/तीनवटासम्म ट्वीनअटर उडान गर्न सकिने सम्भावना रहेको विमान कम्पनीले बताउँदै आएको तर धनगढी विमानस्थलमा विमानलाई राति राख्न मिल्ने व्यवस्था नभएको भन्दै उनीहरु नै बझाङमा उडान भर्न आनाकानी गर्दै आएका छन् ।

विमान सञ्चालन हुन छाडेपछि नागरिक उड्डयन प्राधिकरणले विमानस्थलका कर्मचारीलाई अन्तै सरुवा गरेको छ । हाल बेवारिसेजस्तै बनेको विमानस्थल स्थानीयवासीको खेलमैदान र गौचरनमा परिणत भएको छ भने विमानस्थलस्थित टावर रहेको भवन स्थानीय केटाकेटीको शौच गर्ने ठाउँमा परिणत भएको छ ।

केही वर्षअघि मात्र निर्माण सम्पन्न भएको उक्त भवनका झ्यालढोकामा रहेका शिशा पनि फुटाइएका छन् । हिउँदे वर्षा भएको बेला र बर्खाकोे समयमा विभिन्न ठाउँमा पहिरो गएर राजमार्ग अवरुद्ध हुने गरेका कारण आपत्कालीन बिरामीले वर्षेनी ज्यान गुमाउने गरेका छन् भने यात्रुले पनि सास्ती भोग्दै आएका छन् ।

गत वर्ष असारदेखि भदौसम्म तीन महिनाको अवधिमा बझाङलाई अन्य जिल्लासँग जोड्ने जयपृथ्वी राजमार्ग पटक–पटक गरी ४१ दिन अवरुद्ध भएको थियो । यस अवधिमा उपचारका लागि धनगढी लैजाँदै गरेका पाँच बिरामीले बाटैमा ज्यान गुमाउनुपरेको थियो । अब नियमित उडान भर्न सके धेरैको ज्यान जोगिने स्थानीयवासी बताउँछन् ।