पोखरा, १८ असाेज । कास्कीको नयाँपुलमा स्कुटर दुर्घटना हुँदा १ जनाको मृत्यु भएको छ । मृत्यु हुनेमा स्याङ्जा आँधीखोला गाउँपालिका–६ का अन्दाजी ३५ वर्षीय पुष्कर बस्नेत हुन् ।

पोखराबाट पर्वत सदरमुकाम कुश्मातर्फ जाँदै गरेको ग१०प २१२२ नम्बरको स्कुटर अन्नपूर्ण गाउँपालिका–५ नयाँपुलस्थित पर्वत र कास्की सिमाना जोड्ने पक्की पुलको बारमा शनिबार दिउँसो साढे ४ बजे अनियन्त्रित भएर ठक्कर खाँदा दुर्घटनामा परेको हो ।

दुर्घटनामा २५ वर्षीय स्कुटर चालक सन्तोष न्यौपाने र पछाडि बसेका पुष्कर बस्नेत घाइते भएकोमा उपचारक्रममा बस्नेतको मेट्रोसिटी अस्पताल, पोखरामा मृत्यु भएको प्रदेश प्रहरी कार्यालयले जनाएको छ।

स्कुटर चालक सन्तोषको अवस्था भने सामान्य छ ।