पोखरा १७ असोज । पोखरा जेसिजले युवा उधमशीलताको लागी साक्षात्कार कार्यक्रम गर्दै जेसिज सप्ताहको अन्त्य गरेको छ । युवाहरुलाई कसरी उधमशीलता बन्ने भन्ने विषयमा साक्षात्कार कार्यक्रम सहित सम्पन्न गरेको हो ।

अनलाईनमार्फत सञ्चालन गरिएको उक्त कार्यक्रमा बोल्दै पर्यटनविद् तथा सफल पर्यटन व्यवसायी कर्ण शाक्यले जीवनलाई पढाईले मात्र नभएर भोगाइले समेत सफल बनाउने बताए । एउटा सफल व्यवसायी बन्नको लागि आफ्नो भोगाइलाईनै मार्ग बनाउन आवश्यक रहेको उनले बताए ।

‘हामीले जीवनमा चुनौतिको सामना गरेकै छौँ । भोगेको दुःखले कथा बोक्ने गर्छ सुखले कथा बोक्दैन । समस्याको समाधान गर्न सकेमात्र अघि बढ्न सकिन्छ । समाधान भनेकै समस्याको छायाँ हो । समस्या आएपछिमात्र विकल्प निकाल्ने गरिन्छ जस्ले सफलताको बाटो तर्फ लैजान्छ’ शाक्यले भने ।

कार्यक्रममा पूर्व गर्भनर तथा नेपाल सरकार पूर्व पर्यटन सचिव दीपेन्द्र ढकाल, जेसिज पदाधिकारीहरुको समेत सहभागिता रहेको थियो । समाज विकासको लागि अग्रसर जेसिजले आफुहरुलाई धेरै कुराहरु सिक्ने र सिकाउने मौका दिएको कार्यक्रम संयोजक मिनराज खड्काले जानकारी दिए ।

जेसिज पोखराका अध्यक्ष शिवप्रसाद सापकोटाले प्रतिकुलतालाई समेत अनुकुलतामा बदलेर कार्यक्रमको आयोजना गरिएको बताए । यस अघि पोखरा जेसिजले गरेको स्वास्थ्य, शैक्षिक, खेलकुद तथा खाध सामग्री वितरण तथा महिलाहरुको लागि सेनेटरी प्याड बनाउने तालिम सम्पन्न गरेको थियो । शुक्रवार ‘गण्डकी युवा वक्ता सिजन २’ सम्पन्न गरेको छ । सो प्रतियोगिताको प्रथम राधा पंगेनी, द्वितीय प्रेरणा पराजुली तथा तृतीय कौशल कार्की भएका थिए । उनीहरुले क्रमशः नगद ५ हजार, ३ हजार र २ हजार रुपैँया प्राप्त गरे ।