भूपू सैनिकलाई पनि वृद्धभत्ता दिलाउन सांसद गुरुङको माग

Avatar आदर्श समाज सम्वाददाता
असाेज १६, २०७७

पोखरा, १६ असोज ।  गण्डकी प्रदेश सांसद मीना गुरुङले सरकारले बेलायत र भारतीय सेनामा कार्य गरेका ज्येष्ठ नागरिकलाई वृद्ध भत्ता नदिने निर्णयले ठूलो असर पारेको बताएकी छन् ।

शुक्रबार प्रदेशसभाको विशेष समयमा बोल्दै सांसद गुरुङले विदेशी भूमिमा लामो समय रगत र पसिना बगाइ आर्जेको धनसम्पत्ति स्वदेशमै रेमिट्यान्समार्फत भित्र्याई धेरैलाई रोजगारी सिर्जना गर्नेहरुको सीपको कदर गर्नुपर्नेमा जोड दिइन् ।

उनीहरुलाई सामाजिक सुरक्षा भत्ताअन्तर्गत वृद्धभत्ता दिने निर्णयले भूतपूर्व सैनिकसँग आश्रित परिवारलाई नकारात्मक असर पारेको र संविधानप्रदत्त हकअधिकारमाथि आघात पुर्‍याएकाे भन्दै टिप्पणी गरिन् ।

गण्डकीमा हाल करिब ९० हजार गोरखा भूपूहरु रहेको उल्लेख गर्दै सांसद गुरुङले धेरैथोरै भन्दा पनि आफू नेपाली नागरिक हुनुको गर्व गरी अन्तिम समय बिताउन चाहने भूपू गोर्खाहरुको भावनाको कदर गर्नुपर्नेमा जोड दिइन् ।

नेकपा सरकारले ज्येष्ठ नागरिकप्रति उत्तरदायी रहँदै क्रमशः भत्ता रकम बढाउँदै लगेको भएपनि भूपू सैनिकहरुको सवालमा भने उनीहरुसँग असीमित अनुभवप्रति अनुदार रहँदै नागरिक अधिकारबाट वञ्चित गर्नु नहुने बताइन् ।

साथै सांसद गुरुङले तत्काल उनीहरुलाई पनि वृद्धभत्ता दिलाई सम्पूर्ण गोर्खालीहरु र गोर्खा परिवारप्रति न्याय गर्नुपर्नमा जोड दिइन् ।