पोखरा, ८ असोज । पोखरा महानगरपालिका वडा नम्बर २० कार्यालय सिल गरिएको छ ।

कोरोना संक्रमितको कन्ट्याक्ट ट्रेसिङमा वडाध्यक्ष सहित अन्य जनप्रतिनिधि र कर्मचारी समेत परेपछि उनीहरुको रिपोर्ट नेगेटिभ नआउञ्जेल वडाका सम्पूर्ण कामकाज बन्द हुने गरी कार्यालय सिल गरिएको हो ।

असोज १ मा वडा एक महिलामा कोभिड–१९ संक्रमण पुष्टि भएपछि उनको कन्ट्रयाक ट्रेसिङमा परेका ४ मध्ये २ जनाको रिपोर्ट पोजेटिभ आएको थियो । साथै उनीहरुको कन्ट्रयाक ट्रेसिङमा वडाध्यक्षसहित जनप्रतिनिधि र कर्मचारीहरु समेत परेकाले उनीहरुको बिहीबार स्वाब संकलन गरिएको र रिपोर्ट नआउञ्जेल वडा कार्यालय पूर्णरुपमा सिल गरिएको वडाध्यक्ष सिम गुरुङले जानकारी दिए ।

वडाले विज्ञप्ति जारी गरी वडामा पहिलो संक्रमितसँगको कन्ट्रयाक ट्रेसिङमा परेका थप २ जनामा कोरोना पुष्टि भएको र उनीहरुको कन्ट्रयाक ट्रेसिङमा वडाध्यक्षसहित जनप्रतिनिधि र कर्मचारी गरी २९ जनाको स्वाब संकलन भइसकेकोले रिपोर्ट नआउँदासम्म वडा पूर्ण रुपमा बन्द रहने र वडाबाट हुने कुनै पनि कामकाज समेत नहुने जनाइएको छ ।