बन्दाबन्दी हटाउन शान्तिपूर्ण प्रदर्शन गरिने

Avatar आदर्श समाज सम्वाददाता
भाद्र ३१, २०७७

पोखरा, २९ भदौं । फाइट अगेन्स्ट कोरोना स्क्याम तथा फ्रिडम फ्रन्ट नेपालले शान्तिपूर्ण प्रदर्शन गर्ने भएको छ ।

‘लकडाउन हटाऔं, जनजीवन सामान्य बनाऔं’ नाराका साथ असोज १ गते चिप्लेढुङ्गामा शान्तिपूर्ण प्रदर्शन गर्न लागेको फाइट अगेन्स्ट कोरोना स्क्याम तथा फ्रिडम फ्रन्ट नेपालका संयोजक राजु कायस्थले जानकारी दिए ।

विगत ६ महिना लामो सन्त्रासपूर्ण लकडाउन, निषेधाज्ञा, सिल, लगायत नाममा बन्दाबन्दीले मानिसहरुलाई अनावश्यकरुपमा भयभित पार्ने र तिनको मनोवैज्ञानिक असरबाट अब हाम्रो समाजलाई मुक्त गरी जनजीवन सामान्य गर्नका लागि दबाब दिन प्रदर्शन गरिन लागिएको कायस्थले जानकारी दिए ।

संस्थाले प्रदर्शन सफल बनाउन सरकारी तथा विभिन्न संघ संस्थामा ध्यानकर्षण पत्र समेत बुझाइसकेको छ ।

संस्थाले जिल्ला प्रशासन कार्यालय कास्की, पोखरा महानगरपालिका, पोखरा उद्योग वाणिज्य संघ लागयतका पोखरामा रहेका व्यावसायिक संघसंस्था,शैक्षिक, खेलकुद तथा धार्मिक एवम् सांस्कृति संघ संस्थामा प्रदर्शन गर्ने उद्देश्यको बारेमा जानकारी गराएको संयोजक कायस्थले जानकारी दिए ।

‘पूर्ण रुपमा लकडाउन हटाइ जनजीविका सामान्य बनाउने उद्देश्यले नै प्रदर्शन आयोजना गरेका हौं’ कायस्थले भने, ‘शान्तिपूर्ण प्रदर्शनमा सहभागी भई पूर्ण रुपमा लकडाउन हटाउन दबाब दिन सम्पूर्णमा अनुरोध गर्दछु ।’