सेन्ट्रल सिटीको विद्याश्रमलाई सहयोग

Avatar आदर्श समाज सम्वाददाता
भाद्र २८, २०७७

पोखरा । लायन्स क्लब अफ पोखरा सेन्ट्रल सिटीले शनिबार पोखरा–१८ स्थित पोखरा चिसाखोला वेद विद्याश्रममा खाद्यान्न तथा २१ थान प्लाष्टिकका कुर्सी हस्तान्तरण गरेको छ ।

प्रमुख अतिथि क्लस्टर २४ लायन्स माधव पौडेलले वेद विद्याश्रमजस्तो पवित्रस्थलमा सहयोग कार्यक्रम ल्याएकोमा आयोजक संस्थालाई धन्यवाद दिँदै पूर्वीय दर्शनले बताए बमोजिम सेवा गरेपछि पुण्य प्राप्त हुने र त्यसबाट नै धर्म प्राप्त हुने प्रस्ट्याए । साथै अहिले विज्ञानमा पनि संस्कृत भाषाको महत्व रहेको भन्दै अध्ययनरत् वटुकलाई लगनशीलताका साथ अघि बढ्न आग्रह गरे ।

क्लब अध्यक्ष राजेश शील्पकारले वैदिक धर्म र संस्कृति रक्षामा लागेको वेद विद्याश्रमको संरक्षणमा हरतरहबाट सहयोगमा जुट्ने प्रतिबद्धता व्यक्त गरे ।

रिजन चियरपर्सन बासुदेव कोइरालाले ‘जहाँ आवश्यकता, त्यहाँ लायन्स’ भन्ने नारा बमोजिम वेद विद्याश्रममा सहयोग कार्यक्रम ल्याएको बताउँदै आफू संलग्न संस्थाबाट समेत सहयोग जुटाउने वचन दिए ।

कार्यक्रम संयोजक प्रदीप सुवेदीले स्वच्छ मनले गरेको दानबाट उद्देश्य पूरा हुने भन्दै सबै जनाले सक्दो सहयोग गर्न आग्रह गरे ।

वेद विद्याश्रमका संरक्षक मोक्षनाथ तिमिल्सिनाले वेद विद्याश्रमको गतिविधिबारे प्रकाश पारे ।

कार्यक्रममा चेतबहादुर कार्की, रामराज सुवेदी, तृतीय उपाध्यक्ष सुमनराज ढकाल, सचिव अर्जुन पौडेल, सदस्य टीकाराम सुवेदी, सुमनकुमार श्रेष्ठ लगायतले बोलेका थिए ।

हाम्रो सुझाव