दमौली । भानुमा समुदायस्तरमै कोरोना भाइरस संक्रमण बढ्दै गएपछि थप १० दिन निषेधाज्ञा गरिएकोे छ।

संक्रमितको सम्र्पकमा आएको समुदायस्तरमा संक्रमितको संख्या बढ्न थालेपछि भानु नगरपालिकाको सिफारिसमा जिल्ला प्रशासन कार्यालय तनहुँले निषेधाज्ञाको आदेश जारी गरेको हो।

गत साउन २७ देखि जारी नगरपालिकाले अत्यावश्यकबाहेकका आवतजावतमा रोक लगाएकोमा त्यसपछि प्रशासनले निषेधाज्ञा आदेश जारी गरेको थियो।

आइतबार मात्र भानु ६ र ७ मा एकै साथ २२ जनामा संक्रमण देखिएपछि पूर्व निर्धारित आइतबार सकिने निषेधाज्ञा अवधि लम्ब्याइएको हो।

संक्रमितको सम्पर्कमा आएकाहरुको भदौ १० मा १ सय ७५ जनाको स्वाब सङ्कलन गरी परीक्षणका लागि पठाएको थियो । जसमा २२ जना नयाँ संक्रमित थपिएका हुन् । यो सहित तनहुँ जिल्लामा कोरोना सङ्क्रमितको संख्या २ सय ७५ पुगेको छ । निको हुनेको संख्या १ सय ९९ रहेको जिल्ला स्वास्थ्य कार्यालय तनहुँले जनाएको छ ।

सहायक प्रमुख जिल्ला अधिकारी चित्रांगत बरालका अनुसार अब भदौ २४ सम्म निषेधाज्ञा हुनेछ । सो अवधि पूरा भए भानु लगातार एक महिना बन्द हुने तहमा पर्नेछ।

भानु नगरपालिकाका वरिष्ठ अधिकृत सुनिल पाण्डेले संक्रमणको जोखिम बढेकाले कन्ट्याक्ट ट्रेसिङका काममा नगरपालिका केन्द्रित हुने बताए।

‘हाम्रो ध्यान पूरै कन्ट्याक्ट ट्रेसिङ गर्दै अरुलाई थप क्षति हुन नदिनेमा केन्द्रित छ’, उनले भने।

नगरप्रमुख उदयराज गौलीले सावधानी अपनाउँदा अपनाउँदै पनि नगरका विभिन्न भागमा फैलने अवस्था आएकाले संक्रमणको दर कम गराउन निषेधाज्ञा गरेर अझ संक्रमण रोक्न लागेको बताए।