पोखरा । पोखरा–२० भलामको क्वारेन्टिनबाट बिदा भएका तीन जना युवाले नगद सहयोग गरेका छन् । भलामको नाजिम घर भइ भारतबाट आएका खिमबहादुर घर्ती, दुबईबाट आएका भलामका सन्तोष नेपाली र पोखरा–२० मोहोरियाका गोपी गुरुङले ¥यालेचौर वेसीमा रहेको क्वारेन्टिनमा बिहीबार बिदाइ हँुदै गर्दा आर्थिक सहयोग गरेका हुन ।

क्वारेन्टिनमा बसेको ९ दिनपछि उनीहरुको पिसिआर रिपोर्ट नेगेटिभ आएपछि खुसी हुँदै उनीहरुले क्वारेन्टिनमा सहयोग गरेका हुन् ।

उनीहरुमध्ये गोपी गुरुङले ५ हजार ५ सय ५५, सन्तोष नेपालीले ५ हजार र खिमबहादुर घर्तीले ३ हजार २ सय रुपैयाँ आर्थिक सहयोग गरेका हुन् । क्वारेन्टिन बस्दा घरभन्दा पनि राम्रो सेवासुविधा प्रदान गरिएको उनीहरुको भनाइ छ ।

आफू जस्तै व्यक्तिको सहयोगबाट क्वारेन्टिन निर्माण र व्यवस्थापन गरेका कारण त्यसबाट प्रभावित भई स्वतस्फुर्त रुपमा सहयोग गरेको उनीहरुले बताए ।

क्वारेन्टिनको बसाइ अवधिमा प्राप्त सेवासुविधा तथा इन्टरनेटले गर्दा आफूहरुले एक्लोपनको महसुस गर्नुनपरेको बताउँदै उनीहरुले सबै मिलेर कोरोनाको सामना गर्नुपर्ने बताए ।

पोखरा–२० का वडाध्यक्ष तथा ¥यालेचौरबेंसी क्वारेन्टिन होम मूल व्यवस्थापन समितिका संयोजक सिम गुरुङले घर फर्किँदै गर्दा क्वारेन्टिनलाई सहयोग गरेकामा धन्यवाद व्यक्त गर्दै घर फर्के पनि थप सात दिन सुरक्षित रुपमा होम क्वारेन्टिनमा बस्न आग्रह गरे ।

क्वारेन्टिन निर्माण र व्यवस्थापनका लागि विभिन्न व्यक्तिको साथ र सहयोग रहेको तथा हालै निर्मित क्वारेन्टिन भवनमा आठ कोठामा एकै पटक २४ जना रहन सक्ने क्षमता रहेको अध्यक्ष गुरुङले जानकारी दिए ।

उनका अनुसार क्वारेन्टिनमा स्वस्थकर खाना, विदेशबाट ल्याएका सामान राख्ने छुट्टै भण्डार कोठा, छुट्टाछुट्टै शौचालय, क्वारेन्टिनमा बस्नेका लागि तातो तथा चिसो स्वस्थ पिउने पानी, बाथरुम, इन्टरनेटलगायत सुविधा छ ।

क्वारेन्टिन ब्यवस्थापनका लागि दुई सुरक्षाकर्मी, एक स्वास्थ्यकर्मी र एक क्वारेन्टिन सहयोगीसमेत छन् ।

पोखरा– २० कार्यालयले विदेशबाट घर आउनेलाई लक्ष्य गरी ¥यालेचौरस्थित महेन्द्र माविको पुरानो भवनमा क्वारेन्टिन निर्माण गरेको हो ।