लेखनाथ । पोखरेली गायिका सावित्री गिरीले ‘छम्छम् काँचको चुरा’ श्र्रोता–दर्शकमाझ ल्याएकी छन् । उनको सो गीत वरिष्ठ लोकगायिका हरिदेवी कोइरालाले एक समारोहबीच सार्वजनिक गरिन् ।

कोइरालाले आमा समूहको सक्रियतामा संस्कृति संरक्षण भएको भन्दै सो कार्यको प्रशंसा गरिन् । उनले परिवार, समाज र देशमा भएका वास्तविक घटना समेटेर कुन चेलीले, वर्ष भरीमा के कस्ता दुःख, सुख भोगेकी छिन् ती समेटेर तीज गीत बनाउनुपर्ने बताइन् ।

कला र साहित्य हाम्रा अमूल्य निधि हुन् भन्दै उनले तीज गीतको नाममा भएका विकृति–विसंगति हटाउनु पर्ने धारणा राखिन् ।

गायिका सावित्री गिरीले विश्वमा नै कोरोना संक्रमण भाइरस महामारी भएको बेला आफूले तीजको कोसेली ल्याएको भन्दै माया गरिदिन सम्पूर्णमा आग्रह गरिन् । उनले ‘छम्छम् काँचको चुरा, चुलठी धागोले जेलेको सम्झना माया र माइतीको झझल्को सै साथी खेलेको’ भाकामा गीत बनाएर बजारमा ल्याएको बताइन् । उनले छिट्टै तीजको भाकाको कोरोना भाइरसको अर्को गीत पनि ल्याउने लागेको जानकारी दिइन् ।

कार्यक्रममा पोखरा ३२ का वडा सदस्य विष्णुप्रसाद तिवारी, म्यूजिम भिडियो निर्देशक पुकार श्रेष्ठलगायत बोलेका थिए ।

आदर्श आमा समूहकी अध्यक्ष पद्मा गिरीको अध्यक्षतामा भएको सो कार्यक्रममा धन्यवाद ज्ञापन समूहकी उपाध्यक्ष मीना गिरी र सचिव राधा घिमिरेले संचालन गरेकी थिइन् ।

राजाको चौतारा आमा समूहको आयोजना, महेन्द्र गिरीको निर्माण र सावित्रि गिरीको प्रस्तुति रहेको सो गीतको म्यूजिम भिडियो निर्देशक पुकार श्रेष्ठ हुन् ।

शब्द लय तथा मिडियामा कविराज खनाल, छायांकन प्रदीपकुमार नापित, नृत्य निर्देशक प्रीति गुरुङ्ग हुन् । अभिनयमा प्रार्थना श्रेष्ठ छन् ।