धनकुटा । अविरल वर्षाले पहिरो जाँदा धनकुटामा एक दर्जन उद्योगलाई क्षति पुगेको, दर्जनौं पसल तथा १ सय २७ जना व्यवसायीहरुको घर जोखिममा परेको भन्दै तत्काल क्षतिपूर्ति उपलब्ध गराउन सरकारसँग धनकुटा उद्योग बाणिज्य संघले माग गरेको छ ।

संघका अध्यक्ष विजय सन्तोषी राई, नेपाल पत्रकार महासंघ धनकुटाका अध्यक्ष राजेश्वरबहादुर श्रेष्ठ, धनकुटा उद्योग बाणिज्य संघका कोषाध्यक्ष रुपेश श्रेष्ठ, कार्यकारी सदस्य रेजिना पखिले लगायतका सदस्यहरु र कार्यालय सचिव सिचन प्रधान सहितको टोलीले धनकुटा बजारको पहिरोबाट क्षति पुर्‍याएको क्षेत्रहरुको स्थलगत रुपमा अनुगमन गर्दा एक दर्जन वटा उद्योगहरुलाई क्षति पुगेको र दर्जनौं पसल र १ सय २७ जना व्यवसायीहरुको घर जोखिममा परेको जनाएको छ । संघले क्षति भएका उद्योग र व्यवसायीहरुलाई तत्काल क्षतिपूर्ति उपलब्ध गराउन माग गरेको हो ।

पहिरोबाट पशुपति ग्रिल उद्योग धनकुटा, मिलन फर्निचर उद्योग धनकुटालाई क्षति पुगेको र निशान ग्रिल उद्योग धनकुटा र कविता फलफूल प्रशोधन उद्योग, प्रकृति फूड प्रडक्सन उद्योग लगायत धनकुटा जिल्लाको एक दर्जनधन्दा बढी उद्योगहरु जोखिममा परेको र वरिष्ठ साहित्यकार तुलसी दिवसको धनकुटा वडा ६ स्थित सिरान बजारको घर फर्किएर जोखिम परेको र धनकुटा, हिले, पाख्रिबास, सिधुवा, सागुरीगढी, पाख्रिवास, शहीदभूमि, चौबिसे, छथरजोरपाटी, महालक्ष्मी नगरपालिका र धनकुटा बजार क्षेत्रका १ सय २७ जना व्यवसायीहरुको घरहरु पहिरोबाट जोखिममा परेको संघका अध्यक्ष राईले बताए ।