श्रावण १५ गतेदेखि होटल तथा रेष्टुरेन्ट सञ्चालन हुने

विनिता सुनार
श्रावण १४, २०७७
free-hotel-icon-1880-thumb

विश्वभर फैलिएको कोरोना भाइरस (कोभिड–१९) नियन्त्रणका लागि चैत ११ गतेदेखि नेपाल पनि लकडाउनमा थियो । सरकारले विभिन्न मोडालिटी बनाएर लकडाउन खुकुलो पार्दै आएपनि अन्य ठुला व्यवसायसँगै होटल तथा रेष्टुरेन्ट पनि ठप्प थिए ।

तर १२० दिनको लामो लकडाउनलाई अन्त्य गर्दै सरकारले श्रावण १५ गतेदेखि होटल तथा रेष्टुरेन्ट संञ्चालन गर्ने निर्णय गरेको छ । कोरोनाका कारण शून्य भएको पर्यटकीय क्षेत्रमा व्यवसाय सुरु गर्ने वातावरण नभएको भन्दै व्यवसायीहरु अझै अन्योलमा परेको बताउँछन् ।

भिजिट नेपाल २०२० लाई लक्षित गरी नेपाल घुम्न आएका पर्यटकहरु पनि यतिबेला आ–आफ्नो देश फर्किसकेको अवस्था छ । त्यस्तो समयमा लगानी गरी व्यवसायलाई पुनः संञ्चालनमा ल्याउन संञ्चालकहरु दोधारमा परेका छन् । यति मात्र नभई दिनप्रति दिन बढ्दो संक्रमितका कारण लकडाउनलाई अझै कडा बनाउनुपर्ने समयमा हामी व्यवसाय संञ्चालन गर्दा कति सुरक्षित हुन सक्छौ भन्ने संञ्चालकहरुमा प्रश्न समेत उठेको छ । कोरोनाका कारण अहिले हरेक व्यवसायमा मन्डी नै लागेको छ । त्यसमा पनि यो अफसिजनको समयमा व्यवसाय संञ्चालन गर्नु अर्काे ठुलो चुनौती रहेको व्यवसायहरुको गुनासो छ ।

यस्तै पश्चिमाञ्चल होटल संघका अध्यक्ष विकल तुलाचनले सरकारले साउनदेखि होटल व्यवसायहरु खुल्ला गर्ने भनेर सूचना पेस गरेपनि अहिले नै व्यवसाय खोल्ने अवस्था नरहेको बताउँछन् । ‘चार महिनाको लामो लकडाउनले व्यवसायमा धेरै ठुलो क्षति पुगेको छ, उनले भने, ‘त्यसकारण अहिले व्यवासाय संञ्चालन गर्नुभन्दा पनि तयारीमा जुट्दा नै उपयुक्त हुन्छ ।’

‘यो अफसिजनको महिना हो, अब हामी सिजनको लागि तयार भएर बस्नु पर्छ । सेप्टेम्बरबाट सिजन सुरु भएपनि आन्तरिक पर्यटकहरुको चहलचहल बढेपछि मानसिक रुपमा पनि व्यवसाय संञ्चालनमा तयार हुन सकिन्छ,’ उनले भने । त्यसकारण हामी अहिले भन्दा पनि दशैँ तिहारको लागि आन्तरिक पर्यटकलाई टार्गेट गर्नेगरी स्किमहरु ल्याउने तयारीमा रहेको उनले बताए ।

‘अहिले लकडाउनकै कारण कर्मचारीहरु सबै गाउँ गएको अवस्था छ । उनीहरुको टेष्ट स्वास्थ्य चेकजाँचको पनि कुराहरु आउँछन्, होटल संञ्चालन गरिसकेपछि सुरक्षाका पनि कुराहरु आउँछन त्यसलाई पहिलो प्राथमिकतामा राखेर तयारी गर्नु जरुरी छ,’ उनले भने ।
यस्तै पोखरा पर्यटन परिषदको पूर्व अध्यक्ष गणेशबहादुर भट्टराईले सरकारले भने जसरी अहिले नै होटल व्यवसाय खोलेर बस्न अधिकांश होटल तथा रेष्टुरेन्टहरु तयारी नरहेको बताउँछन् । ‘सरकारले यसै १५ गतेबाट व्यवसायहरु संञ्चालन गर भनेर मात्र हुँदैन,’ उनले भने, ‘त्यसको लागि हामी पूर्व तयारीमा छौ कि छैनौ भन्ने बिषय निकै महत्वपूर्ण हुन्छ ।’

सार्वजनिक यातायात र उडान सुचारु नहुँदासम्म कर्मचारीहरु पनि आउने अवस्था नरहेको उनको भनाई छ । लकडाउनकै कारण सबै कर्मचारीहरु गाउँमै छन् । अर्काे कुरा यो परिस्थितिमा पर्यटक चलायमान हुने अवस्था नै छैन् । त्यसकारण यो अवस्थामा व्यवसाय खोल्नु भन्दा पनि सिजनको लागि तयारीमा बस्नु उपयुक्त हुन्छ,’ उनले भने ।

‘नेपालमा संक्रमितको सख्या भलै कम होला तर इन्डियामा दिन प्रति–दिन बढ्दो छ । लकडाउनका कारण घरमा गएका कर्मचारी आएपछि स्वास्थ्य चेकजाँच गरेर मात्र व्यवसाय अघि बढाउनु पर्छ,’ भट्टराइले भने । यति मात्र नभई महानगरपालिका र वडाको सहकार्यमा आफ्नो सिटीमा आउने सबै नागरिकहरुको टेष्ट गर्न सक्यो भने मात्र शहर सुरक्षित हुन सक्ने उनले बताए ।

अहिलेको अवस्थामा बाह्रय पर्यटकलाई भन्दा पनि आन्तरिक पर्यटकलाई जोड दिदैँ अघि बढ्न सकिने उनको भनाई छ । ‘अहिले त आन्तरिक पर्यटक आउनु नै जोखिम बनेको छ, जसकारण हामीले पहिलो चरणमा सुरक्षा, कर्मचारीको सुरक्षा’ उनले भने ।
यस्तै थ्री सिस्टर एण्डभेन्चरका संचालक लक्की कार्कीले पनि अहिले नै आतिएर व्यवसाय खोल्न नहुने हालतमा रहेको बताउँछिन् । ‘सरकारले लकडाउन खोले पनि संक्रमित बढ्ने अवस्था कम भएको छैन,’ ‘हामीले व्यवसाय खोल्नु भन्दा पहिला सुरक्षित हुने प्रार्बद्धन उपलब्ध गर्नुपर्छ,’ उनले भनिन् । पर्यटककीय हिसाबमा नै कुरा गर्ने हो भने यो अफसिजन हो । अहिले आतिएर खोल्नु भन्दा तयारीमा जुट्दा राम्रो हुने उनले बताइन् ।

Related News

सम्बन्धित समाचार

hero news full width