पोेखरा । गाउँ पर्यटन प्रवद्र्धन मञ्च (भिटोफ) गण्डकीले प्रदेशभित्र भएका सामुदायिक होम स्टे साउन १५ गतेदेखि संचालन गर्न माग गरेको छ।

कोरोना भाइरस (कोभिड–१९ ) प्रकोप न्यूनीकरण गर्न सरकारकाले चैत ११ देखि लकडाउन गरी साउन ७ बाट खुला गरेकोमा साउन १५ देखि स्वास्थ्यका आवश्यक सतर्कता अपनाई पर्यटकीय क्षेत्रका व्यवसाय सञ्चालन गर्न अनुमति प्राप्त भएकाले होमस्टेहरु पनि संचालन गर्न दिनुपर्ने भिटोकको माग छ ।

भिटोफ गण्डकी प्रदेशका अध्यक्ष नवराज अधिकारीले मंगलबार विज्ञप्ति जारी लकडाउनको पूर्ण पालना गरेकोमा होमस्टे संचालकहरुप्रति आभार व्यक्त गर्दै सुचारुपश्चात पनि आफू, आफ्नो परिवार र समुदायलाई सुरक्षित राखी प्राकृतिक प्रकोप जोखिमबाट सुरक्षित बनी भीडभाड नगरी सेवा सुचारु गर्नु हुन आग्रह गरेका छन् ।

साथै विज्ञप्तिमा भनिएको छ, ‘विद्यमान अवस्थामा गण्डकी प्रदेशभर सञ्चालनमा रहेका सम्पूर्ण सामुदायिक होमस्टेहरुबाट प्रदान गरिँदै आएका पर्यटकीय सेवा उच्च सतर्कता अपनाई सुचारु गर्न भिटोफ नेपाल गण्डकी प्रदेश ध्यानाकर्षण गराउँदछ ।’