सरकारले मंगलबार (आज) मध्यरातबाट लकडाउन अन्त्य गर्ने निर्णय गरेको छ। सरकारले कोरोना संक्रमणको जोखिमका कारण गत चैत ११ गतेदेखि यति लामो समयसम्म लकडाउन गर्दै आएको थियो ।

सरकारका प्रवक्ता डा. युवराज खतिवडाले स्वास्थ्य मन्त्रालयको प्रस्तावमा राति १२ बजेबाट लकडाउन हटाउने निर्णय भएको जानकारी दिए।

प्रवक्ता डा. खतिवडाले भने, ‘कुनै दिन हाम्रोमा ७ सयसम्म संक्रमित थिए अहिले २ सय भन्दा तल छ। अब यो साउन महिनाभरिको अवस्था हेर्छौं। त्यसपछि भदौमा थप निर्णय लिन्छौं।’

मन्त्रिपरिषद् बैठकले भदौ १ गतेदेखि अन्तर्राष्ट्रिय र आन्तरिक उडान समेत खोल्ने निर्णय गरेको छ। अन्तर्राष्ट्रिय सीमा भने साउन ३२ सम्मलाई स्थगित गर्ने निर्णय भएको छ।