प्रतिभालाई खेलाडी कल्याणकारी कोषबाट आर्थिक सहयोग

Avatar आदर्श समाज सम्वाददाता
श्रावण ६, २०७७

पोखरा । नेपाली राष्ट्रिय महिला भलिबल टोलीकी प्रतिभा मालीलाई राष्ट्रिय खेलाडी कल्याणकारी कोषमार्फत आर्थिक सहयोग प्रदान गरिएको छ ।

राष्ट्रिय खेलकुद परिषद् (राखेप)अन्तर्गत रहेको कोषले घाइते बनेकी प्रतिभालाई सहयोग प्रदान गरेको हो । कोषको ब्याज रकमबाट खेलाडीलाई सहयोग गर्दै आएकोमा यसपटक २ लाख रुपैयाँ सहयोग प्रदान गरेको हो ।

महिला भलिबल टोलीकी महŒवपूर्ण सदस्य प्रतिभाले गत माघमा खेल दौरान चोट लागेपछि शल्यक्रिया गराएर हाल फिजियोथेरापी गराइरहेकी छन् । नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठले प्रतिभाले फिजियो गराउने ग्वार्कोस्थित अर्थोप्लास्ट रिहाविलिटेसन सेन्टर पुगेर २ लाख रुपैयाको चेक हस्तान्तरण गरे ।

चेक हस्तान्तरणमा खेलाडी संघका निर्वतमान अध्यक्ष दीपक विष्ट, संघका महासचिव शिवसुन्दर गोथे, १३औं दक्षिण एसियाली खेलकुदकी दोहोरो स्वर्ण पदक विजेता आयशा शाक्यको उपस्थिति थियो ।

प्रतिभाको उपचारका लागि राखेपले यसअघि नै ५ लाख रुपैयाँभन्दा बढी उपलब्ध गराएको थियो । त्यस्तै, भलिबल संघका पदाधिकारीले पनि व्यक्तिगत रूपमा सहयोग गरेका थिए । उपचार खर्च नपुगेका कारण प्रतिभाले कल्याणकारी कोषमा दिएको निवेदनका आधारमा सहयोग गरेको हो ।

नेपालको महिला भलिबल राष्ट्रिय टोली तथा होङवान्जी न्यू–डायमण्डकी ओपन स्पाइकर प्रतिभाले नेपाललाई एभीसी सेन्ट्रल जोनको उपाधि र १३ औं सागमा रजत पदक जिताउन महŒवपूर्ण भूमिका निर्वाह गरेकी थिइन् । गत माघमा एनभीए कप क्लब च्याम्पियनसीपमा एपीएफविरुद्ध फाइनल खेल्ने क्रममा प्रतिभाको बायाँ घुँडामा चोट लागेको थियो । त्रिपुरेश्वरस्थित ब्लुक्रसमा उनको घुँडाको शल्यक्रिया गरिएको थियो । त्यसको केही समयपछिबाट उनले अर्थोप्लास्टमा फिजियो गराउँदै आएकी छन् ।