पोखरा, २१ असार । उत्कृष्ट सहकारी व्यवसाय पुरस्कार २०७६ बाट पोखरा रोयल बचत तथा ऋण सहकारी संस्था सम्मानित भएको छ । ९८ औं अन्तर्राष्ट्रिय सहकारी दिवसको अवसरमा राष्ट्रिय सहकारी महासंघले नेपाल सहकारी अभियानको तर्फबाट रोयल सहकारीलाई सो पुरस्कार प्रदान गरेको हो ।

भूमि व्यवस्था, सहकारी तथा गरिबी निवारण मन्त्री पद्मा कुमारी अर्याल र राष्ट्रिय सहकारी महासंघका अध्यक्ष मीनराज कँडेलले पोखरा रोयलका सचिव चन्द्रप्रसाद गुरुङ र मुख्य प्रवन्धक मीलन ढकाललाई सम्मानपत्र र नगद प्रदान गरे ।

पोखरा रोयलसँगै साना किसान कृषि सहकारी संस्था रौतहट, चन्द्रागिरि बचत तथा ऋण सहकारी संस्था काठमाडौं, जनउत्थान बचत तथा ऋण सहकारी संस्था, रुपन्देही, हरियो हिरा कृषि तथा जडिबुटी विकास सहकारी संस्था सुर्खेत पनि सम्मानित भएका छन् ।