काठमाडौं, २० असार । नेकपा भित्रको विवाद चुलिएकै अवस्थामा प्रधानमन्त्री केपी ओलीले मन्त्री र सल्लाहकारहरुलाई बालुवाटार बोलाएर आफूले ‘बाइ स्टेप बाई फोर्स’ कदम चाल्न लागेका कारण मन्त्रीहरुलाई आफ्नो कित्ता छुट्याउन निर्देशन दिएका छन् ।

प्रधानमन्त्री केपी शर्मा ओलीले अपर्झट मन्त्री र सल्लाहकारहरुलाई बालुवाटार बोलाएर यस्तो निर्देशन दिएका हुन् । ‘म बाइ स्टेप, बाइ फोर्स कदम चाल्दै छु, तपाईंहरु कता लाग्ने हो निर्धारण गर्नुस्,’ प्रधानमन्त्री ओलीको भनाई उधृत गर्दै एक मन्त्रीले भने, ‘हुल्लडहरुको समूह स्थायी कमिटीले गरेको निर्णय म मान्दिनँ। स्थिति एकदम जटिल छ, हरेकले निर्णय गर्नुपर्ने बेला आएको छ।’

प्रधानमन्त्री ओलीले मन्त्रीहरूसँग सुरुमै ‘ठूलो षडयन्त्र’ भइरहेको भन्दै ‘राष्ट्रपतिलाई महाअभियोग लगाउने’ र आफुलाई ‘प्रधानमन्त्री तथा पार्टी अध्यक्ष दुवै पदबाट हटाउने तयारी भएको’ बताएका थिए। प्रधानमन्त्रीपछि बैठकमा मन्त्रीहरू वर्षमान पुन, घनश्याम भुसाल, पार्वत गुरुङ लगायतले बोलेका थिए।