गण्डकीमा १६ संक्रमित थपिए

ramkumarshrestha रामकुमार श्रेष्ठ
असार २०, २०७७

पोखरा । गण्डकी प्रदेशमा शनिबार १६ जना नयाँ कोरोना संक्रमित थपिएका छन्।

पूर्वी नवलपरासीमा ७ जना, बाग्लुङमा २ जना, म्याग्दीमा ३ जना, स्याङ्जामा १ जना, तनहूँमा १ जना र कास्कीमा २ जना गरी १६ जना नयाँ संक्रमित थपिएका हो।

गण्डकी प्रदेशको स्वास्थ्य निर्देशनालयद्वारा जारी विज्ञप्ति अनुसार पूर्वी नवलपरासीको देवचुली नगरपालिकामा २ महिला र ५ पुरूष, कास्कीको पोखरा महानगरपालिकाको २ जना पुरुष, तनहूँको भिमादका १ जना पुरुष, स्याङजाका पुतली बजारका १ जना पुरुषमा संक्रमण पुष्टि भएको हो।

त्यस्तै म्याग्दीको रघुगंगाको २ जना पुरुष, मंगलाको १ जना पुरुष, बाग्लुङको ढोरपाटनका एक जना पुरुष र बरेङका १ जना पुरुषमा पनि संक्रमण पुष्टि भएको हो।

पछिल्लो पटक थपिएका १६ जना संक्रमितसँगै गण्डकी प्रदेशमा कोभिड १९ बाट संक्रमित हुनेको संख्या १ हजार ७९ जना पुगेको छ।

यसैगरी गोरखाका पालुङटार गाउँपालिका ७ निवासी ४४ बर्षीय पुरुषको शनिबार विहान निधन भएसँगै गण्डकी प्रदेशमा कोरोना संक्रमणबाट मृत्यु हुनेको संख्या ३ जना पुगेको गण्डकी प्रदेशको कोरोना नियन्त्रण तथा रोकथाम कार्यक्रमका निर्देशक तथा प्रवक्ता विनोद विन्दु शर्माले बताए ।