पोखरा । नेपालका उसु राष्ट्रिय खेलाडी वीरमान वाइवाको आकस्मिक निधन भएको छ ।

नेपालको तर्फबाट १८ औं एसियन गेम्समा सहभागी भएका वाइवाको काभ्रेस्थित आफ्नै घरमा सुतिरहेको अवस्थामा मृत भेटिएको पारिवारिक स्रोतले जनाएको छ ।

पारिवारिक स्रोतअनुसार शनिबार राति अभ्यास गरेर घर आएपछि खाना खाएर सुतेका थिए । तर, बिहान ढिलासम्म नउठेपछि किन ढिला उठ्यो भनेर जाँदा वाइवा मृत भेटिएको पारिवारिक स्रोतले जनाएको छ ।

वाइवा विभागिय टोली नेपाली सेनाको त्रिभुवन आर्मी क्लबका खेलाडी हुन् । इन्डोनेसियामा सम्पन्न १८ औं एसियन गेम्समा नेपालको प्रतिनिधित्व गरेका थिए । एसियन गेम्सको छनोट प्रतियोगिताका रुपमा रहेको राखेप च्याम्पियनसीपमा स्वर्ण पदक जित्दै उनी एसियन कपका लागि छनोट भएका थिए ।

उसु खेल्नुभन्दा अगाडि उनी नेपाल क्योकुशिन फुल कन्ट्याक्ट् कराते खेलाडी रहेको उनका सहकर्मी किरणसिंह साउदले बताएका छन् । वाइवा तेकोसिन करातेमा नेपालबाट १० पटकभन्दा बढी च्याम्पियन रहिसकेका छन् ।