इटालियन सिरी ए मा लिसीमाथि फराकिलो गोल अन्तरले युभेन्ट्सको जित

Avatar आदर्श समाज सम्वाददाता
असार १३, २०७७

पोखरा । इटालियन सिरि ए फुटबलमा युभेन्ट्सले लिसीबिरुद्ध फराकिलो गोल अन्तरले जित हात पारेको छ ।

शुक्रबार राति भएको खेलमा युभेन्ट्सले लिसीलाई ४–० को फराकिलो गोल अन्तरले हराएको हो । युभेन्ट्सको जितमा पाउलो डी–बाला, क्रिस्टियानो रोनाल्डो, गोन्जालो हिग्विन र म्याथिज डी लिटले १/१ गोल गरे ।

खेलको ५३ औं मिनेटमा डी–बालाको गोलमा घरेलु टोली युभेन्ट्सले सूरुवाती अग्रता लिएको थियो । रोनाल्डोले पेनाल्टीमा गोल गर्दै युभेन्ट्सको अग्रता दोब्बर बनाए । बैकल्पिक खेलाडीको रुपमा मैदान छिरेका गोन्जालो हिग्विनले ८३ औं मिनेटमा युभेन्ट्सलाई ३–० को अग्रता दिलाए । लगत्तै, त्यसको २ मिनेटमा डी लिटले हेडमार्फत चौथो गोल गर्दै युभेन्ट्सको जित सुनिश्चित गरे ।

जितसँगै युभेन्ट्सले तालिकामा ७ अंकको अग्रता लिएको छ । सिरी ए मा ६९ अंक जोडेको शीर्ष स्थानको युभेन्ट्सले दोस्रो स्थानको लाजियोसँग ७ अंकको अग्रता बनाएको हो । लिसी २५ अंक सहित रेलिगेशन जोनमा संघर्षरत छ ।