मादी गाउँपालिकाले कटौती गर्‍यो बैठक भत्ता

rss रासस
असार १२, २०७७

कास्की, ११ असार | मादी गाउँपालिकाले कोभिड–१९को कारणले गाउँपालिकाको अर्थतन्त्र प्रभावित भएको जनाउँदै जनप्रतिनिधिको लगायतको बैठक भत्ता कटौती गरेको छ ।

गाउँपालिका उपाध्यक्ष विष्णुमाया आचार्यले बुधबार गाउँसभामा प्रस्तुत गरी सभाबाट पारित आर्थिक वर्ष २०७७/०७८ वार्षिक बजेट कार्यक्रममा कोरोनाका कारणबाट शिथिल हुन पुगेको गाउँपालिकाको अर्थतन्त्रलाई गतिशिल बनाउनको लागि गाउँपालिकाबाट आयोजना गरिने सवै प्रकारका बैठकको भत्ता कटौती गरिने उल्लेख छ ।

उनले गाउँपालिकाकाले आयोजनामा हुने विभिन्न बैठकमा सहभागी भए बापत दिइदै आइएको कर्मचारी, जनप्रतिनिधि लगायत सबैको भत्ता खारेज गरिएको जानकारी दिँदै बजेट तर्जुमा गर्दा गाउँपालिकाको आन्तरिक स्रोतको परिचालन मार्फत राजश्व अभिवृद्धि गरी तत्काल रोजगारी सिर्जना हुने क्षेत्रमा लगानी हुने कार्यक्रम तर्जुमा गरिएको उल्लेख गरे ।

गाउँपालिकाले वर्तमान अवस्थामा रोजगारी सिर्जना, कृषि तथा पशुपालनको क्षेत्रमा लगानीको सुनिश्चितता, पूर्वाधार विकास क्षेत्रमा स्थानीय स्रोत, साधन तथा मानवीय स्रोतको भरपूर परिचालन गरी रोजगारी वृद्धिको लक्ष्य सहित आगामी वर्षका लागि ६५ करोड ७४ लाख ७२ हजार ५४८ को बजेट पारित गरेको छ । सो गाउँपालिकाले चालू आवमा गाउँपालिका तथा वडा कार्यालयबाट संचालन हुने गरी स्वीकृत योजना तथा कार्यक्रम कोभिड–१९ का कारण सिर्जित अवस्थाबाट प्रभावित भई सञ्चालन हुन नसकेका योजना तथा कार्यक्रमलाई आगामी आवमा क्रमागतमा राखी सञ्चालन हुने व्यवस्था गरिएको उनले जानकारी दिए ।

गाउँपालिकाले कृषि विकास, पशुपालन तथा उद्यम विकास मार्फत अधिकतम रोजगारीका अवसर सृजना गर्ने, विदेशबाट फर्केका युवाहरुलाई स्वदेशमा नै स्वरोजगार हुन प्रेरित गर्ने, कोरोना रोकथाम नियन्त्रण तथा व्यवस्थापन तथा पालिका केन्द्र र वडा केन्द्रहरुलाई जोड्ने रणनीतिक महत्वका सडकहरुको स्तरोन्नति तथा गाउँपालिका प्रशासकीय भवन, बहुउद्देश्यीय भवन,विद्यालय भवन लगायतका संरचनाहरु निर्माणलाई बजेटमा प्राथमिकतामा राखेको छ ।

गाउँपालिकाको प्रशासकीय भवन, वडाहरुको कार्यालय भवन,सामुदायिक भवन निर्माण र अन्य भवन संरचना निर्माण तथा मर्मतका लागि रु पाँच करोड ३५ लाख, गाउँपालिकाको प्रस्तावित चक्रपथ याङ्जाकोट–तोगी–वार्चोक–भाचोक–नागिधार–पोशी–पक्र्यु सडकको बाँकी ट्रयाक खोल्न २० लाख तथा स्थानीयस्तरका सडकहरुको निर्माण तथा स्तरोन्नति, नयाँ ट्रयाक खोल्न र गोरेटो वाटो सुधारको लागि २ करोड १६ लाख सहित पूर्वाधार कार्यक्रममा रु १८ करोड विनियोजन गरिएको छ ।

पशु धन तथा वागवानी विकासका कार्यक्रमका लागि १८ लाख ७० हजार, अध्यक्षसँग युवा स्वरोजगार कार्यक्रमको लागि ५० लाख, कृषि तथा पशुपालन अनुदान, औजार उपकरण तथा कृषि प्रर्वद्धन गरी रोजगारी सिर्जनाका लागि ६४ लाख विनियोजन गरिएको छ । आयआर्जन सम्वन्धी कार्यक्रम तथा सचेतनामूलक तालिमका लागि ५३ लाख ७४ हजार तथा कृषि तथा पशु औजार उपकरण वितरण अनुदान र कृषि तर्फको सामान्य पूर्वाधार निर्माण सुधारका लागि २५ लाख ३० हजार विनियोजन गरिएको उनले जानकारी दिए ।

त्यसैगरी सामाजिक विकासतर्फ ३३ करोड ३६ लाख ९१ हजार विनियोजन गरिएको छ । एक घर एक धारा निर्माण तथा खानेपानी आयोजनाहरुको मर्मत सुधारको लागि ३३ लाख ८० हजा, युवा, खेलकुद तथा संस्कृति संरक्षण तर्फ १७ लाख, उपाध्यक्षसँग महिला बालवालिका तथा अपाङ्गता भएका व्यक्ति लक्षित कार्यक्रमको लागि १५ लाख, लक्षित कार्यक्रममा ४६ लाख तथा विद्यालयको कार्यसम्पादनमा आधारित अनुदान, स्वास्थ्य संस्था तलव अनुदान र महिला स्वास्थ्य स्वंय सेविका प्रोत्साहन भत्ता समेत गरी ५२ लाख प्रस्ताव गरिएको छ ।

कोरोना भाइरसको प्रकोप रोकथाम, नियन्त्रण तथा व्यवस्थापन तथा अन्य विपद व्यवस्थापन कार्यमा खर्च गर्ने गरी प्रकोप व्यवस्थापन कोषमा रु एक करोड तथा विपद् व्यवस्थापनसम्बन्धी अभिमूखीकरण, भू–क्षय नियन्त्रण, नदी नियन्त्रण, सरसफाई सम्वन्धी कार्यक्रमहरु संचालन गर्न २० लाख ८५ हजार बजेट छुट्टाइएको गाउँपालिकाले जनाएको छ ।

हाम्रो सुझाव