पोखरा, ९ असार । पाल्पाको तानसेन-हार्थोक सडकखण्डअन्तर्गत सम्माबारीमा सोमबार पहिरोले गाडी बगाउँदा मृत्यु हुनेहरुको सनाखत भएको छ ।

मुत्यु हुनेमा चितवन भरतपुर नगरपालिका–२९ बाङ्गेसालका ३३ वर्षीय वीरबहादुर गुरुङ, पाल्पा रिब्दीकोट गाउँपालिका–२ देउरालीका ३२ वर्षीय भुवन खाम्चा र काभ्रेपलाञ्चोक पाँचखाल नगरपालिका–८ हुस्केबजारका २८ वर्षीय निवेश श्रेष्ठ रहेको जिल्ला प्रहरी कार्यालयका प्रहरी निरीक्षक सुरज श्रेष्ठले बताए ।

पहिरो खस्दा अवरुद्ध तानसेन–११ को सो सडकखण्डमा पहिरो र गाडी हटाइएपछि यातायातका साधन मंगलबार बिहानदेखि सञ्चालनमा आएका छन् ।

पहिराले लु २ ख १३७६ नम्बर ट्रक र लु १ क १९२८ नम्बरको ट्याङ्करलाई बगाएको हो । ट्रक भीरमा अड्किएको छ भने ट्याङ्कर तल खोल्सामा टुक्राटुक्रा अवस्थामा भेटिएको छ ।
लु १ च ७०११ नम्बरको कार र लु २ च ७०४३ नम्बरको पिकअप जीपलाई सडकबाट हटाइएपछि यातायातका साधन सञ्चालनमा आएका छन् ।

२ जनाको शव घटनास्थलमै भेटिएकोमा १ घाइतेको उपचारक्रममा मिसन अस्पतालमा मृत्यु भएको हो ।

सोमबार साँझ साढे ५ बजेतिर खसेको पहिरो झण्डै डेढ सय मिटर लामो थियो । उद्धार कार्यमा नेपाली सेना, सशस्त्र प्रहरी, नेपाल प्रहरी सहित स्थानीय खटिएको पाल्पाका प्रजिअ रमेश न्यौपानेले जानकारी दिए ।

पहिरो गएको क्षेत्र सदरमुकाम तानसेनदेखि करिब ७ किमी पश्चिममा पर्छ । तानसेन नगरपालिकाले सो सडकखण्डमा सडक विस्तार गर्दैआएको छ ।