बार्सिलोनासँगै रियल मड्रिड स्पेनिस ला लिगाको शीर्ष स्थानमा

Avatar आदर्श समाज सम्वाददाता
असार ८, २०७७

पोखरा । बार्सिलोनालाई उछिन्दै रियल मड्रिड स्पेनिस ला लिगको शीर्ष स्थानमा उक्लिएको छ ।

गएराति सोसिडाडको घरेलु मैदानमा भएको खेलमा रियल मड्रिडले सोसिडाडलाई २–१ गोल अन्तरले हराएको हो । रियलले बार्सिलोनासँग अंक बराबरी गर्दै हेड टु हेडका आधारमा तालिकाको शीर्ष स्थान बनाएको हो । शुक्रबार बार्सिलोनाले सेभिल्लासँग गोलरहित बराबरी खेलेसँगै रियललाई शीर्ष स्थानमा उक्लिने अवसर प्राप्त भएको हो ।

शीर्ष स्थानको रियलले ३० खेलबाट ६५ अंक जोडेको छ । सोसिडाड ४७ अंक सहित छैटौं स्थानमा छ । रियाल मड्रिडका सर्जियो रामोसले नयाँ रेकर्ड समेत बनाएका छन् । उनी ला लिगाको इतिहासमा सर्वाधिक गोल गर्ने पहिलो डिफेन्डर बनेका हुन् ।

रियल सोसिडाडसँगको खेलमा १ गोल गरेका रामोसले बार्सिलोनाका पूर्व खेलाडी रोनाल्ड कोइमनको रेकर्डलाई पछि पारेका हुन् । ला लिगामा रामोसले गोल संख्या ६८ पु¥याएका छन् ।

यस्तै, स्पेनिस ला लिगामा भ्यालेन्सियाले ओसासुनालाई २–० ले हराएको छ । घरेलु मैदानमा भएको खेलमा भ्यालेन्सियाका गोन्सालो गुइडेस र रोड्रिगोले १/१ गोल गरे । त्यस्तै, अर्को खेलमा सेल्टा भिगोले फराकिलो जित निकालेको छ । सेल्टाले डिपोर्टिभो अल्भेसलाई ६–० गोल अन्तरले पराजित गरेको हो ।

जितसँगै सेल्टा ३० अंक जोडेर लिगको १६ औं स्थानमा उक्लिएको छ । डिपोर्टिभो ३५ अंकका साथ १३ औं स्थानमा रहेको छ ।