पाेखरा । प्रतिपक्षी दल नेपाली काँग्रेसकी सांसद मनकुमारी गुरुङले ब्यवसाय जीवनरक्षा कोष कार्यान्वयनको स्पष्ट मापदण्ड नभएको कारण कार्यकर्ता मुखी हुन सक्ने आशंका गरेकी छिन् । गण्डकी प्रदेशको आगामी बजेटमाथी छलफल गर्दै उनले अवण्डा बजेट ल्याएर उद्योगी ब्यवसायीको रक्षा नहुने भन्दै स्पष्ट नीति आवश्यक पर्ने बताईन्।

‘हामीले पहिले पनि अवण्डा बजेट ल्याउनु हुँदैन भनेका थियौं । ब्यवसाय जीवन रक्षा कोषको नाममा १ अर्व आयो । यसको मापदण्ड खै ?,’ उनले भनिन्, ‘कार्यविधि पहिले नै स्पष्ट हुनुपर्छ । अन्यथा कार्यकर्तालाई खुसुखुसु पैसा बाँड्ने कार्यक्रम हो । यो जनतामुखी बजेट होईन । उद्योग ब्यवसायलाई टिकाउन, जोगाउन र सुचारु गर्न यसले सहयोग गर्दैन । यो १ अर्वले कार्यकर्ता जोगाउने मात्रै हो, उद्योगी ब्यवसायलाई जोगाउँदैन । यसमा मेरो आपत्ति र शंका छ ।’

उनले स्थानीय तहले पठाएका कार्यक्रम र योजनाहरु प्रदेश सरकारले महत्व नदिएको बताईन् । ‘बजेट बक्तब्य सुन्दा र पाना पल्टाएर हेर्दा बोलम त के बोलम ? नबोलम धोति पोलम जस्तो भएको छ । बोलौं भने सरकारलाई विरोध गरेको जस्तो मात्रै देखिन्छ । नबोलौं भने जनताका भावना पोलिएका छन्,’ उनले थपिन्, ‘नीति तथा कार्यक्रममा धेरै सुझाव दिएका थियौं । तर सुझाव समेटिएको देखिएन । बजेट जनताको भावना विपरित आएको छ। संघीयताप्रति जनताको आकर्षण बढाउन सकेन । स्थानीय तहहरुले प्राथमिकताका साथ पठाएका योजनाहरु बजेटले समेट्न सकेन । ति योजनाहरु कुन कितावमा आउने हो ? रातो कितावमा ? निलो कितावमा ? पहेंलो, हरियो कुनमा हो ? मैले छुट्याउन सकिन ।’

सांसद गुरुङले बजेटले परम्परा धान्ने र कार्यकर्तालाई ध्यान दिएको आरोप लगाईन् । ‘बजेट सँधै उस्तै भयो । योजना अलपत्र छन् । बजेट चाहीँ आधा पनि खर्च भएको छैन,‘ उनी भन्छिन्, ‘चौंथो बर्ष पनि उही कार्यक्रम उही पैसा ? यो बर्षको परिस्थिति बेग्लै छ । परिस्थितिलाई हेरेर बजेट आउँछ भनेको तर हातमा लाग्यो शून्य भयो ।’ उनले महामारी बर्षैपिच्छे आउने भन्दै उनले त्यसको उपचार र रोकथाममा ख्याल गर्न सरकारको ध्यानाकर्षण गराईन् ।