पोखरा । गण्डकी प्रदेश सरकारले प्रदेशको खेलकुद क्षेत्रका लागि झण्डै १० करोड बजेट छुट्टाएको छ ।

प्रदेशको आर्थिक मामिला तथा योजनामन्त्री गुरुङले आव ०७७/०७८ को बजेट प्रस्तुत गर्दै बजेटमा समग्र खेलकुदको विकासका लागि खेलकुद क्षेत्रको नीति, संरचना, पूर्वाधारमा जोड दिइएको बताएको छ । तरपनि प्रदेशले खेलकुद क्षेत्रका लागि छुट्टाएको बजेट न्यून रहेको खेलविज्ञहरुले बताएका छन् ।

प्रदेशस्तरिय बहुउद्देश्यीय रंगशाला, क्रिकेट रंगशाला, गल्फकोर्ष, स्की, उच्च उचाईमा खेलकुद तालिम केन्द्र, जिल्लास्तरिय रंगशाला, एक स्थानीय तह एक खेलकुद मैदानका लागि ८ करोड ३५ लाख छुट्टाइएको छ ।

राष्ट्रिय तथा अन्तराष्ट्रिय खेलकुद आयोजना, खेलाडीलाई प्रोत्साहन गर्न र समग्र खेलकुद विकासका लागि आवश्यक बजेट छुट्टाएको बजेट भाषणमा उल्लेख छ । राष्ट्रिय खेलकुद परिषद्द्वारा पोखरामा आयोजना हुने नवौं राष्ट्रिय खेलकुद प्रतियोगितामा गण्डकी प्रदेशबाट सहभागी खेलाडीहरुको आवश्यक व्यवस्थापन र प्रशिक्षणका लागि १ करोड ५० लाखको बजेट विनियोजन गरेको छ । प्रदेश सरकारको तर्फबाट राष्ट्रिय खेलकुद प्रतियोगितामा विजयी खेलाडीहरुलाई पुरस्कृत गर्ने आवश्यक आवश्यक व्यवस्था समेत मिलाएको बजेट भाषणमा उल्लेख छ ।