पोखरामा उपचारार्थ ल्याइएकी महिलाको निधन

Avatar आदर्श समाज सम्वाददाता
जेठ २४, २०७७

Representative Image

उपचारका लागि अस्पताल ल्याइएकी एक महिलाको पोखरामा शनिबार निधन भएको छ ।

पोखराको लेखनाथ सामुदायिक लायन्स अस्पतालमा उपचारार्थ ल्याइएकी ३७ वर्षीया महिलाको निधन भएको हो ।

पोखरा–३०, खुँदीकी ती महिलालाई लामो समयदेखि श्वासप्रश्वास समस्या रहेकोमा शनिबार मध्याह् पुनः समस्यादेखिपछि अस्पताल ल्याइएकोमा दिउँसो करिब २ बजेतिर निधन भएको प्रहरीले जनाएको छ ।

अस्पतालका मेडिकल सूपरीन्टेन्डेन्ट डा. प्रकाश भट्टराईले अस्पताल ल्याई पुर्याउँदा बिरामीको मुटुको धड्कन रोकिसकेको र केही समयपछि मृत घोषणा गरिएको बताए।

शनिबार बिहान वान्ता गरेपछि स्थानीय मेडिकलबाट औषधी खाएको र केही समयपछि अचानक बेहोस भएको बताइएको छ ।

ती महिलाको मृत्यु कोरोनाको कारण भए नभएकोबारे स्वाब संकलन गरी परीक्षणका लागि पोखरा स्वास्थ विज्ञान प्रतिष्ठानको प्रयोगशालामा पठाइएको छ ।

शव भने आफन्तले बुझेर लगिसकेको डाँडाकोनाक प्रहरी चौकीका इञ्चार्ज डीएसपी अर्जुन रानाभाटले बताए ।

कास्कीमा हालसम्म ४ जनामा कोरोना संक्रमण भेटिएको छ ।