शान्ति समाज कास्कीको २५औं स्थापना दिवस

Avatar आदर्श समाज सम्वाददाता
जेठ २०, २०७७

पोखरा, १९ जेठ । मानव अधिकार तथा शान्ति समाज, कास्कीले जेठ १९ गते शान्ति समाजको २५ औं स्थापना दिवस मनाएको छ ।

कोरोना कहर र लकडाउनले निम्त्याएको असहज परिस्थितिमा पनि सामाजिक दूरी कायम राख्दै समाजको स्थापना दिवस मनाइएको हो । मानव अधिकार, शान्ति, अहिंसा र लोकतन्त्रका प्रतीक चारवटा मैनबत्ती प्रज्वलित गरी सुरु गरिएको कार्यक्रममा शुभकामना मन्तब्य राख्दै समाजका सल्लाहकार कुलबहादुर नेपालीले शान्ति समाजको ईतिहास गौरवमय भएको बताउँदैे देश र जनाताको अधिकार स्थापनार्थ समाजको स्थापना भएको कुरा बताए ।

मन्तब्यमा सल्लाहकार नेपालीले विश्वनै कोरोना कहरसंग जुधिराखेका बेला छिमेकी राष्ट्र भारतले सिमाना विवाद निम्याएर नेपालको सार्वभौमिकता माथि औंला उठाएको बताए । स्वाभीमानी नेपाली ईतिहासमा कहिल्यै कसैसंग नझुकेको बताउँदै देशले आफ्नो भूमिफिर्ता गरेरै छाड्ने समेत उल्लेख गरे ।

यसैगरी उनले रुकुमको घटनाको घोर निन्दा गर्दै आजको युगमा जातीय विभेदका कारण पाँच युवाको हत्या हुनेगरी भएको घटना नेपाली समाजका लागि लज्जास्पद र दुर्भाग्यपूर्ण भएको भन्दै दोषीहरुलाई कडा सजायँको माग गरे । शान्ति समाज कास्कीका सभापति अमृत सुवर्णकारको अध्यक्षतामा सम्पन्न उक्त कार्यक्रममा अध्यक्षको तर्फबाट शुभकामना मन्तब्य राख्दै शान्ति समाज देश र विश्वमा विद्यामान जातीय, लैङ्गिक, रङ्गभेद लगायत सबैखाले विभेदको विपक्षमा लड्ने बताए । साथै उनले रुकुमको घटना अमानवीय घटना भएकाले सबै पीडितहरुले उचित न्याय पाउनु पर्ने र पीडकहरुलाई हदैसम्मको कारवाही हुनुपनेमा जोड दिए ।

कार्यक्रममा समाजका कोषाध्यक्ष रुद्रबहादुर नेपाली, सदस्य पार्वती बराल लगायतले स्थापना दिवसको शुभकामना दिएका थिए । लकडाउनका कारण कार्यक्रममा उपस्थित हुन नसक्ने समाजका सदस्यहरुले फोन मार्फत शुभकामना ब्यक्त गरेका थिए । कार्यक्रम शान्ति समाज कास्कीका सचिव रामकृष्ण ढुङ्गानाले सञ्चालन गरेका थिए ।