पाल्पा, १९ जेठ । सोमबार थप २ जनामा कोरोना पुष्टि भएसँगै पाल्पामा कोरोना संक्रमित ५ पुगेका छन् ।

यसअघि आइतबार रैनादेवी छहराका २ र माथागढी गाउँपालिकाका १ गरी ३ जनामा कोरोना संक्रमण पुष्टि भएको थियो ।

सोमबार भैरहवास्थित प्राशिक प्रयोगशालामा गरिएको परीक्षणमा निस्दी गाउँपालिकाका २ जना पुरुषमा कोरोना संक्रमण पुष्टि भएको हो । उनीहरु १७ र ३६ वर्षीय पुरुष रहेको स्वास्थ्य कार्यालय, पाल्पाले जनाएको छ । एकहप्ता अगाडि भारतबाट आएका उनीहरू स्थानीय क्वारेन्टाइनमा बस्दै आएका थिए ।

आइतबार संक्रिमत पुष्टि भएका ३ जनालाई तानसेन भुसलडाँडामा निर्माण गरिएको आइसोलेसनमा राखिएको स्वास्थ्य कार्यालयका नि. प्रमुख विश्वनाथ न्यौपानेले जानकारी दिए । उनका अनुसार बिरामीको स्वास्थ्य अवस्था सामान्य रहेको छ ।

पाल्पाबाट प्रदेश जनस्वास्थ्य प्रयोगशालामा गरिएका २ सय ७२ जनाको परीक्षणमा २ सय ६२ जनाको रिपोर्ट नेगेटिभ आएको छ । अन्य ५ जनाको भने रिपोर्ट आउन बाँकी छ ।

देशभर कोरोना संक्रमितको संख्या भने १ हजार ८ सय ११ पुगेको छ । सोमबार कुल २ सय ३९ नयाँ संक्रमित फेला परेको स्वास्थ्य मन्त्रालयले विज्ञप्तिमार्फत जनाएको छ ।