पोखरा, १९ जेठ । तमु धिं युकेले युकेमा रहेका तमु लगायत नेपालीलाई संक्रमणबाट सुरक्षितका लागि विभिन्न जागरण कार्यक्रम र सहयोग गरेको छ ।

तमु धिं युकेका विभिन्न क्षेत्रीय इकाईहरु मध्ये एक क्रियाशील साउथ इष्ट रिजनल तमु धि युके पनि जुटेको छ, यस्तो अभियानमा । कोरोनाको महामारी कहिलेसम्म कसैले बताउन सक्ने अवस्था छैन। राहत प्रदान गरे केही दिनमा सकिएला तर दीर्घकाल सुविधाका लागि सोंच जरुरी छ। त्यसैले विरामीको उपचार गर्ने, उपचारमा खटिने, संक्रमितलाई उपचार गर्नुपर्ने चिकित्सक, नर्स एंव सहयोगीहरु सुरक्षित रहनुपर्दछ भनि साउथ इष्ट रिजनल तमु धिं युकेले आज फ्रन्टलाईनरमा रहने चिकित्सक, नर्स एव स्वास्थ्य सहयोगीको सुरक्षाका लागि सेनिटाइजर र मास्क सहयोग हस्तान्तरण गरेको छ।

पोखरा स्वास्थ्य विज्ञान प्रतिष्ठानका निर्देशक डा.अर्जुन आचार्य र डिन डा.नरेन्द्र विक्रम गुरुङलाई साउथ इष्ट रिजनल तमु धिं युकेका उपाध्यक्ष पार्वती गुरुङ, कार्यसमिति सदस्य धनज्योति गुरुङ, हरिकाशी गुरुङ, धर्मवती गुरुङ र धनु घलेले १ लाख बराबरको सेनिटाइजर र मास्क सहयोग हस्तान्तरण गरेका हुन् ।

राहत ग्रहण गर्दै पोखरा स्वास्थ्य विज्ञान प्रतिष्ठानका निर्देशक डा.अर्जुन आचार्यले कोरोनाले अत्यन्तै प्रभावित पारेको मुलुक युकेदेखि साउथ इष्ट रिजनल तमु धिंले चिकित्सक, स्वास्थ्यकर्मीहरुको सुरक्षाका लागि सामग्री उपलब्ध गराउनु भएकोमा धन्यवाद व्यक्त गरे । राहत प्रदान गर्नुहुदै साउथ इष्ट रिजनल तमु धि युकेकी उपाध्यक्ष पार्वती गुरुङले संस्था स्थापना, संस्थाले गर्दै आएको गतिविधि संस्थाका नेतृत्वको दुरदर्शी योजना र कार्यक्रमका बारेमा जानकारी दिइन् ।