अनलाइन चेसको छनोट चरणबाटै नेपाली खेलाडीहरु बाहिरिए

आदर्श समाज सम्वाददाता
जेठ १६, २०७७
Online Chess

पोखरा । नेपाली खेलाडीहरु एसियन जुनियर बोइज एन्ड गल्र्स अनलाइन चेस च्याम्पियनसीप २०२० को छनोट चरणबाट बाहिरिएका छन् ।

एसियन चेस महासंघको आयोजनामा भएको खेलमा नेपाली ६ खेलाडी सहभागी भएकोमा सबै बाहिरिएको नेपाल चेस संघले जनाएको छ ।

संघकी महिला कमिसन प्रमुख मोनालिसा खुम्बुका अनुसार च्याम्पियनसीप ३.२ जोन अन्तर्गत नेपाल, बंगलादेश, पाकिस्तान, श्रीलंका र मालदिभ्स रहेको समूहमा नेपालका ३÷३ पुरुष र छात्रा गरि ६ खेलाडी सहभागी थिए ।

स्विस प्रणालीअन्तर्गत ९ चरणको खेलमा छात्र खुलातर्फ अबिशेष्क श्रेष्ठ ४ अंक प्राप्त गरेर छैटौं स्थानमा रहे । यस्तै, ३.५ अंकसहित विवेक श्रेष्ठ सातौं र ३.५ अंकका साथै निकेन कुशथा दसौं स्थानमा रहँदै प्रतिस्पर्धाबाट बाहिरिए ।

त्यस्तै, छात्रातर्फ खुस्बु थापा सातौं, अनिशा न्यौपाने आठौं र कृतिसरा अधिकारी नवौं स्थानमा रहँदै प्रतिस्पर्धाबाट बाहिरिए । थापा र न्यौपानेले समान ३.५ तथा अधिकारीले ३ अंक प्राप्त गरे ।

बंगलादेशका खेलाडी शीर्ष २ स्थान रहँदा श्रीलंकाका खेलाडी तेस्रो भए । छात्रातर्फ शीर्ष ३ स्थानमा बंगालादेश, श्रीलंका र बंगलादेशका खेलाडी रहे । पहिलो चरणमा शीर्ष तीन स्थानमा रहेका खेलाडी फाइनल चरणका लागि छनोट भएका छन् ।

विजेतालाई एसियन जुनियर (छात्रा) अनलाइन चेस च्याम्पियनसीप २०२० घोषित गरिनुका साथै पहिलो पुरस्कार १ हजार ५ सय, दोस्रो पुरस्कार १ हजार र तेस्रो पुरस्कार ५ सय डलर तथा प्रमाणपत्र रहेको छ । यस्तै, महिलातर्फ पहिलो पुरस्कार ७ सय ५०, दोस्रो पुरस्कार ५ सय र तेस्रो पुरस्कार २ सय ५० डलर नगद सहित प्रमाणपत्र रहेको छ ।

Related News

सम्बन्धित समाचार

hero news full width