स्याङजा । तरुण दल स्याङजाले जिल्लाको ४ वटा चोकमा हातधुने मेसिन सहितको टंकी राखेकाे छ । कोरोना भाइरस संक्रमणलाई न्यूनीकरणमा सहयोग गर्ने उद्देश्यले मुख्य बजारमा खुट्टाले थिचेर हात धुने (अटोमेटिक फुट अपरेटेड ह्याण्ड वास ) ४ वटा मेसिन जडित टंकी राखिएको हो ।

जसमा हातको प्रयोग नगरी दुई खुट्टाको सहायताले पानी र साबुन आउनेगरी मेसिन जडान गरिएका छन् । सिद्धार्थ राजमार्ग अन्र्तगत स्याङजा खण्डका मुख्य बजारमा नेपाल तरुण दल स्याङजाले मेसिन राखेको हो । सदरमुकाम एवं पुतलीबजार नगरपालिकाको मुख्यबजारको सहिदचोक, भीरकोट नगरपालिकाको बयरघारी बजारमा, वालिङ नगरपालिकाको वालिङ मोडमा र गल्याङ नगरपालिकाको गल्याङ बजारमा ती मेशिन राखिएका हुन ।

स्ट्याण्ड सहितको पानी टंकी, वेसिन, साबुन, पानीको सहित ब्यवस्था मिलाएर र स्थानीय नागरिकले नै संरक्षण गर्नेगरी बजारका मुख्य/मुख्य चोकमा राखिएको तरुण दलका जिल्ला सभापति भागवतप्रकाश मल्लले जानकारी दिए । तरुण दल जिल्ला कार्य समिति, नगर समिति र क्षेत्रीय समितिको सहयोगमा खुट्टाद्वारा स्वचालित मेसिन राखिएको हो । झण्डै एक लाख खर्च गरेर तरुण युवाको सक्रियतामा मेसिन राखिएको हो । मुख्य बजार राखिएकाले पैदलयात्री, मजदूर तथा सर्वसाधारण लगायत कार्यालयमा आउने सेवाग्राही समेत लाभान्वित भएका छन् ।

मेसिनको दुईतर्फ खुट्टाले थिच्दा पानी र साबुन पाउछ । जो सुकैले पनि यसको सजिलै प्रयोग सक्नेगरी इन्जिनियर अनुप श्रेष्ठले तयार पारेका हुन । जिल्लामै उपलब्ध स्रोत र साधनको प्रयोगगरी विश्व स्वास्थ्य संगठनको मापदण्ड अनुरुपकै तयार पारिएको इन्जिनियर श्रेष्ठले जानकारी दिए ।