लुम्बिनी विकास बैंकद्वारा सहयोग

Avatar आदर्श समाज सम्वाददाता
जेठ २, २०७७

पोखरा | लुम्बिनी विकास बैंकले लेकसाइडमा विपन्नलाई लक्षित गरी ५० हजार बराबरको सामग्री सहयोग गरेको छ ।
कोभिड—१९ महामारी नियन्त्रणका लागि सरकारले घोषणा गरको लकडाउनमा अफ्ठ्यारोमा परेकाहरुलाई सहयोग गरिएको हो ।
पोखरा ६ अन्तर्गत बैदाम आसपास क्षेत्रमा समस्यामा परेका विपन्न वर्गलाई बैंकले ५ सय केजी चामल, ५० केजी दाल, ५० केजी चना, ५० लि. भट्टमास तेल र ५० पोका नुन लगायतका खाद्यान्न सामग्री हस्तान्तरण गरेको हो ।
बैंक सञ्चालक समिति सदस्य रामचन्द्र सिग्देल र पूर्व अध्यक्ष तथा संस्थापक सुशीलराज पराजुलीले संयुक्त रुपमा वडाध्यक्ष जगतबहादुर पहारीलाई सो सामग्री हस्तान्तरण गरका हुन् ।
यस्तै, वडाध्यक्ष पहारीले बैंकले गरेको सहयोगले राहत मिल्ने बताए ।
त्यस्तै, सञ्चालक सिग्देलले बैंकले यसप्रकारको राहत बैशाखभर पोखरा १५ र १७ लगायत देशको विभिन्न स्थानमा गरिसकिएको बताए ।
लेकसाइड शाखाका शाखा प्रबन्धक महेन्द्रकुमार श्रेष्ठले बैंकको ७ वटै प्रदेशमा उपस्थिति रहेको छ भने हाल देशभर ६८ शाखा कार्यालय मार्फत आधुनिक बैंकिङ्ग सेवा प्रदान गर्दै आएको जानकारी दिए ।
कार्यक्रममा वडा सदस्य हरिकृष्ण पहारी, राममाया बिक लगायत बैंकका प्रबन्धक प्रकाशचन्द्र पहारी र कर्मचारीको उपस्थिति थियो ।