समान तलब पाउनुपर्ने मागसहित दर्ता गरेको मुद्दा अदालतले खारेज गरेपछि अमेरिकी महिला फुटबल टिमले त्यसविरुद्ध अपिल दर्ता गरेको छ ।

एक साताअघि अमेरिकी पुरुष टिमको तुलनामा आफूहरूले न्यून तलब पाएको भन्दै महिला खेलाडीहरूले दायर गरेको मुद्दालाई एक न्यायाधीशले खारेज गरिदिएका थिए । महिला टिमका २८ खेलाडीले अमेरिकी फुटबल संघविरुद्ध गत वर्ष मुद्दा दायर गरेका थिए । समान ज्याला ऐनअन्तर्गत उनीहरूले ६ करोड ६० लाख अमेरिकी डलर क्षतिपूर्ति माग गरेका थिए ।

खेलाडीको तर्फबाट प्रवक्ता रहेकी मोली लेभिनसनले अदालतको निर्णयविरुद्ध हिजो अपिल गरेको बताएकी छन् ।

‘समान तलब भनेको पुरुष खेलाडीले जुन दरमा पारिश्रमिक पाउँछन्, महिला खेलाडीले पनि त्यही दरमा पाउनुपर्छ भन्ने हो,’ लेभिसनले भनिन् ।

अमेरिकी महिला टिमले गत वर्ष महिला विश्वकपको उपाधि जितेको थियो । अमेरिकी महिला फुटबल टिमको यो चौथो विश्वकप उपाधि थियो । उनीहरूले ओलम्पिकमा पनि स्वर्ण पदक जितेका थिए ।