नवलपरासी, २३ बैशाख । पूर्वी नवलपरासीको देवचुली नगरपालिकाको वडा नम्वर ९ मा रहेको ऐलानी तथा सार्वजनिक जग्गा वडा कार्यालय मातहतमा ल्याउने निर्णय भएको छ ।

मंगलवार वडा कार्यालय परिसरमा बसेको सर्बदलीय बैठकले घुमाउरीदेखि १० नम्वर वडाको सिमानासम्म लोकाहा खोलाले कटान गरेर छोडेको सार्वजनिक जमिन सदुपयोग गर्नका लागि पहलकदमी उठाउन यस्तो निर्णय गरिएको देवचुली ९ का वडाध्यक्ष मेखबहादुर सारुले बताए ।

उनका अनुसार सो क्षेत्रमा खोलाले छोडेको, खोल्सा–खाल्सी समेत गरी करीव १० देखी १२ बिगाहा एलानी जमिन हुनसक्ने अनुमान छ । अव वडाको सर्बदलीय निर्णय भएका कारण नगरपालिकाबाट अमिन प्राबिधिक सहितको टोली ल्याएर क्षेत्रफल नापजाँच गरिने उनले बताए ।

त्यस क्षेत्रका जमिनमध्ये केही भाग स्थानीयले घाँसपात लगाएर उपयोग गरिरहेको र केही भागमा खेतीपाती समेत गरिएको छ । धेरै क्षेत्रफल भने प्रयोग बिहीन रहेको छ । वडाध्यक्ष सारुको अध्यक्षमा बसेको बैठकमा वडासदस्यहरु, राजनैतिक दलका प्रतिनिधीहरु, स्थानीय संघसंस्थाका प्रतिनिधीहरु सहित स्थानीय बुद्धिजिबीहरुको संयुक्त बैठकले सर्बसम्मत निर्णय गरेको हो ।