पोखरा । पोखरास्थित एसओएस बालग्राम गण्डकीले कोरोना रोकथाम राहत कोषमा गण्डकी प्रदेश सरकारकालाई एक लाख बढि रकम प्रदान गरेको छ ।

गण्डकी प्रदेश सरकारद्धारा स्थापना गरेको कोरोना रोकथाम राहत कोषका लागि उक्त बालग्रामको परियोजना अन्तर्गत कार्यरत शिक्षक/शिक्षिका तथा कर्मचारी, आमा/अन्टीलगायतका कर्मचारीहरुले एक दिनको तलव कटाएर १ लाख, १ हजार ८२ रुपैयाँ राहत कोषमा रकम जम्मा गरेका हुन् ।

बालग्रामका योजना निर्देशक भगतकुमार श्रेष्ठ, निर्देशक प्रदिपभक्त आचार्य, प्रिन्सिपल राजेन्द्रकुमार श्रेष्ठ, सहायक प्रिन्सिपल चुडामणी सुवेदी र शिक्षक तथा कर्मचारी युनियनका अध्यक्ष प्रभात पौडेलको टोलीले गण्डकी प्रदेशका मुख्यमन्त्री पृथ्वीसुब्बा गुरुङलाई मंगलबार एक कार्यक्रमबीच सोही रकम बराबरको चेक हस्तान्तरण गरेको हो ।

सोही अवसरमा बोल्दै मुख्यमन्त्री गुरुङले प्रदेश सरकारले स्थापना गरेको कोरोना रोकथाम राहत कोषमा सहयोग गरेवापत एसओएस बालग्राम गण्डकीलाई धन्यवाद दिए । प्रदेश सरकारले कोरोनाका बिरामीको निशुल्क उपचार गर्नेदेखि अरू व्यवस्थापनमा उक्त कोषको रकम खर्च गर्ने मुख्यमन्त्री गुरुङको भनाई थियो ।

विश्वव्यापी रुपमा नोबेल कोरोना (कोभिड–१९) ले महाव्याधीको रुप लिएपछि गण्डकी प्रदेश सरकारले पनि कोरोना रोकथामका लागि १५ करोड रूपैयाँको कोष स्थापना गरेको हो । सो राहत कोषमा गण्डकी प्रदेशको सबै मन्त्रीको एक महिनाको तलव कट्टा गरेर जम्मा गरिएको छ ।

गण्डकी प्रदेश सरकारको अर्थमन्त्री किरण गुरुङको संयोजकत्वमा आर्थिक मामिला तथा कानूनमन्त्री, भौतिक पूर्वाधार र सामाजिक विकास मन्त्री र प्रदेशका प्रमुख सचिव सदस्य रहने गरी कोरोना रोकथाम तथा व्यवस्थापन समितिको गठन गरेको छ ।