कास्की जिल्लाकाे भलाममा मजदुरको हत्या

आदर्श समाज सम्वाददाता
वैशाख २१, २०७७

तस्वीर– ओम हमाल

पोखरा, २१ वैशाख । पोखरा–२० भलाममा शनिवार राति एक मजदुरको बिभत्स हत्या भएको छ ।

ओखलढुंगा जिल्ला सुनकोशी गाउँपालिका–५ मुलखर्क निवासी ५५ वर्षीय टंकबहादुर तामाङ्गको हत्या भएको हो । पोखरा–२० का अध्यक्ष सीम गुरुङका अनुसार टाउकोमा गहिरो चोट र आखाँ खुटेको अवस्थामा आइतबार विहान उनी  मृत भेटिएका थिए ।

एक महिनादेखि स्थानीय सडकमा काम गर्दै आएका उनलाई उनकै भतिज इन्द्र तामाङ्ग लामाले हत्या गरेको हुन सक्ने अनुमान गरिएको छ । उनीसँगै बस्दै आएका इन्द्र तामाङ्ग लामा बेपत्ता छन्। मादक पदार्थ सेवन गरेका दुवैजना आपसमा विबाद गर्न थालेपछि अर्का एक जना मजदुर त्यहाँबाट भागेको र बिहान आइहेर्दा टंकबहादुर मृत अवस्थामा भेटिएको बताइएको छ।

कास्की प्रहरीले टोली आइतबार विहान घटनास्थलमा पुगेर अनुसन्धान कार्य अगाडि वढाउनुको साथै तामाङको शव शल्यपरीक्षणको लागि पश्चिमाञ्चल क्षेत्रीय अस्पताल लगेको छ । हत्यामा सम्लग्न व्यक्तिको खोजीकार्य भइरहेको जिल्ला प्रहरी कार्यालय कास्कीका प्रवक्ता राजकुमार केसीले बताए ।