हिमपहिरोमा परी मृत्यु भएकाको शव पोखरामा

rss रासस
वैशाख २०, २०७७
Saujagya1

पोखरामा रहेको सेनाको सेकेण्ड रेञ्जर बटालियनले अन्नपूर्ण गाँउपालिका–११ हिङकु केभ इलाकामा शुक्रबार फेला पारेका दुई शव । गत माघ ३ गते उक्त क्षेत्रमा गएको हिमपहिरोमा परी बेपत्ता भएका ३ नेपाली गाइड तथा ४ कोरियन पर्यटकमध्ये २ जना नेपाली गाइड र ३ कोरियन पर्यटकको शव यसअघि फेला परिसकेको तथा फेला पर्न बाँकि एक नेपाली र एक कोरियन नागरिकको शव शुक्रबार फेला पारी शनिबार पोखरा स्वास्थ्य विज्ञान प्रतिष्ठानमा ल्याइएको छ । तस्वीर सौजन्यः नेपाली सेनाको मुख्यालय/रासस

नेपाली सेनाले कास्कीको अन्नपूर्ण गाउँपालिका वडा नं ११ हिङकुकेभ इलाकामा गत माघ ३ गते गएको हिमपहिरोमा परी बेपत्ता भएका दुई जनाको शव आज पोखरा ल्याएको छ । सैनिक जनसम्पर्क तथा सूचना निर्देशनालयका अनुसार उक्त पहिरोमा हराएकामध्ये भेटिन बाँकी रहेको एक नेपाली र एक कोरियनको शव शुक्रबार फेला परेको हो ।

सङ्कलित शव अहिले पोखरा स्वास्थ्य विज्ञान प्रतिष्ठानमा राखिएको छ । बेपत्ता व्यक्तिको खोज तथा उद्धारका लागि खटिएको सेनाको टोलीले यी दुईसहित तीन नेपाली पथप्रदर्शक र चार कोरियन पर्यटकको शव फेला पारेको हो ।

टोलीले हराएकामध्ये दुई नेपाली र तीन कोरियनको शव पहिले नै फेला पारेको थियो । नेपाली सेनाको पश्चिम पृतनाको समन्वयमा विशेष फौज बाहिनीअन्तर्गत पोखरामा रहेको सेकेण्ड रेञ्जर बटालियनबाट खटिएको खोज तथा उद्धार टोलीले शव सङ्कलन गरी ल्याएको उक्त निर्देशनालयले जानकारी दिएको छ ।

Related News

सम्बन्धित समाचार

    hero news full width

    sanil ads

    wordlink ads