नवलपरासी, २० बैशाख । पूर्वी नवलपरासीको विनयी त्रिवेणी गाउँपालिकाको सर्दीमा रहेको होङसी सिमेन्टमा काम गर्दागर्दै कारखानाको दोस्रो तल्लाबाट खसेर निधन भएका मजदुरका परिवारलाई कारखानाले २५ लाख क्षतिपूर्ति दिने भएको छ ।

कारखानामा रहेका मदजुरहरुको विमा रकम वापतको १० लाखमा कारखानाले १५ लाख थप गरेर २५ लाख दिने सहमति भएको विनयी त्रिवेणी गाउँपालिकाका अध्यक्ष डम्बरबहादुर जिसीले बताए ।

विनयी त्रिवेणी गाउँपालिका ४ निवासी २५ बकर्षीय मदनदास श्रेष्ठको कारखानामा रहेको त्रिपाल झिक्ने क्रममा दोस्रो तल्लाबाट खसेर निधन भएको थियो ।

सम्बन्धित समाचार

• होङ्सी सिमेन्ट मजदुरको खसेर मृत्यु

गाउँपालिका अध्यक्ष जिसीको रोहबरमा कारखाना प्रशासन, देशभक्त जनगणतान्त्रिक मोर्चा नेपालका प्रदेश ४ अध्यक्ष नेत्र रानाभाट लगायत स्थानीय राजनीतिक दलका प्रतिनिधि एवम् स्थानीय बुद्धिजीवि, प्रहरी लगायतको सहभागितामा भएको छलफल पछि मृतकका परिवारलाई २५ लाख क्षतिपूर्ति उपलब्ध गराउने सहमति भएको हो ।

मृतक श्रेष्ठको शव भरतपुर अस्पतालमा रहेको छ । छतबाट खसेर गम्भीर घाइते भएको श्रेष्ठको उपचारको लागि भरतपुर लैजादै गर्दा बाटोमा नै निधन भएको हो ।

उनको शव शनिबार पोष्टमाटर्म गरी आफन्तलाई जिम्मा लगाइने भएको छ ।