Worldlink ads

अनलाईन कक्ष नचलाउन महानगरको निर्देशन

प्रकाश ढकाल
वैशाख १८, २०७७
pokhara metropolitaincity office

पोखरा । लकडाउन पछि परीक्षा र नतिजा समेत रोकिएका विद्यार्थी अहिले घरभित्रै छन् । एसईई सहित ११ र १२ कक्षाको परीक्षा भएको छैन । विश्वविद्यालय तहका परीक्षा पनि चलेका छैनन् । गएको चैत ५ गतेभित्र परीक्षा सकिएका विद्यार्थीहरुको नतिजा पनि आएको छैन ।

तर लकडाउन थपिँदै गएपछि विद्यार्थीहरुको मानसिकता नमोडियोस् भनेर सम्बन्धित विद्यालयहरुले धमाधम अनलाईन मार्फत पढाउन थालेका छन् । पोखराका सबैजसो बोर्डिङ स्कुलहरुमा यो पढाई सुरु भैसकेको छ । पश्चिम क्षेत्रकै सबैभन्दा ठूलो क्याम्पस पृथ्वीनारायण क्याम्पसमा पनि अनलाईनमा पाठ्यक्रम बनाएर पढाउन थालिएको छ।

तर पोखरा महानगरपालिकाले यसरी हुने अनलाईन कक्षा बन्द गर्न निर्देशन दिएको छ । विहिबार एक विज्ञप्ती जारी गरी महानगरले अनलाईनबाट हुने पढाई रोक्न भनेको हो । ‘पूर्वाधार छैन । इन्टरनेटको पहुँच पनि सबै ठाउँमा पुगेको छैन । सम्बन्धित निकायको अनुमति विना पढाईने अनलाईन कक्षाले झन् विकृति निम्त्याउन सक्छ,’ विज्ञप्तीमा भनिएको छ, ‘अनलाईनको पहुँचमा नरहेका विद्यार्थी र अभिभावकलाई यसले मानसिक दवाव दिन सक्छ। यसबारे महानगरमा उजुरी पनि दर्ता भएको छ । तसर्थ अनुमति विना कुनैपनि अनलाईन कक्षा नगर्नु नगराउनु हुन सुचित गरिन्छ।’

महानगरको शिक्षा महाशाखा प्र्रमुख गंंगाबहादुर गुरुङ ९ कक्षाभन्दा तलका कक्षामा अनलाईन पढाई बन्द गर्न आग्रह गरे । ‘सेसन चलेको छैेन। रिजल्ट भएको छैन । अहिले किन हतार गर्नुपर्छ ?,’ उनले भने, ‘रिजल्ट भएपछि पनि स्कुल जान सक्ने अवस्था नभए सरकारले नै कुनै ब्यवस्था गर्ला । अहिले तत्कालै बन्द गर्नुपर्छ ।’ त्यो भन्दा माथिल्ला कक्षाहरु नियमित रुपमा सञ्चालन गर्न सकिने उनको भनाई छ। ‘माथिल्ला कक्षाको विद्यार्थी परीक्षा कुरिरहेका छन् । निशुल्क कक्षा चलाउन सक्नुहुन्छ,’ उनले अघि थपे, ‘३ कक्षालाई पनि पढाएको भनेर उजुरी आयो । अहिले यो आवश्यक छैन ।’ अभिभावकको सल्लाहमा सञ्चालक समितिले निर्णय गरेर मात्रै अरु कक्षामा अनलाईन पढाई गर्न उनको सुझाव छ।

Related News

सम्बन्धित समाचार

    hero news full width

    Jewellery

    sanil ads

    wordlink ads