पोखरा, बैशाख १७ । कारोना भाइरस रोकथामका लागि देश अहिले लकडाउनमा छ । सबै नागरिकहरु होम क्वारेन्टिनमा बस्न बाध्य छन् । त्यहि लकडाउनका कारण परेको समस्याको आधारमा निर्देशक नेत्र गुरुङको कथा तथा निर्देशनमा छोटो फिल्म ‘राहत’ युट्युबमा सार्वजनिक भएको छ ।

नेत्र ईण्टरटेन्टमेन्टको प्रस्तुतीमा उक्त भिडियो बुधबार सार्वजनिक भएको हो । उनले केहि समय पहिला ‘लकडाउन’ नामको छोटो फिल्म पनि युट्युबमा सार्वजनिक गरेका थिए ।

राहत प्याकेजको दुरुपयोग सँगै लकडाउनका कारण दैनिक ज्यालादारी मजदुरको व्यथालाई देखाउन खोजिएको छ ।

कोरोना संक्रमण रोक्न सरकारले गरेको लकडाउनका बेलामा दैनिक ज्यालादारी मजदुरको हातमा कसरी पुगेको छैन भन्ने बिषयमा फिल्म बनाइएको निर्देशक नेत्र गुरुङले बताए।

उक्त छोटो चलचित्रमा पत्रकार तथा कलाकार रेम रसाईली, विभु भुसाल, अनिषा श्रेष्ठ सहित गीता पराजुली र प्रतिक्षा पौडेलको अभिनय रहेको छ ।

प्रकाश ‘गुरुङ काश’ ले खिचेको फिल्मलाई विजयराज अधिकारीको निर्माण व्यवस्थापक रहेको छ । उक्त छोटो फिल्ममा पोखरा फिल्म सोसाइटी, ज्ञान करियर ईन्ष्टिच्युट, जक्सन डटकम, प्रोडक्सन सी लगायतका सँस्थाहरुले सहयोग गरेका छन् ।