पोखरा, १६ बैशाख । कोभिड १९ कोरोना भाइरसले विश्वमा महाव्याधीका कारण नेपाल लकडाउन छ। महिना अघिदेखिको लकडाउनले नागरिकहरुमा दिन दिनै समस्या थपिदै गएको छ। यसैक्रममा हिमाली साँस्कृतिक परिवारले खाद्यान्न अभावमा परेका कलाकारहरुलाई सोमवार राहत स्वरुप खाद्यान्न वितरण गरेको छ।

लोक सँस्कृति संरक्षण र विकासका लागि क्रियाशील पोखरा ९ पुरानो बसपाकस्थित हिमाली साँस्कृतिक परिवारले सोमवार पोखरा १५ नयाँ गाँउमा आयोजित कार्यक्रममा हिमाली साँस्कृतिक परिवारका ११ जना कलाकारहरुलाई एक/एक बोरा चामल, दाल, तेल, नून, सोयबीन लगायतका खाद्यान्न वितरण गरेको हो। खाद्यान्न समस्यामा रहेका कलाकारहरुलाई परिवारका अध्यक्ष मेनकाजी गुरुङले खाद्यान्न वितरण गरिएको हो ।

उक्त खाद्यान्न राहत वितरणमा रामबजारस्थित समाज विकास समितिले दुई जना कलाकारहरुका लागि खाद्यान्न वापत रकम उपलब्ध गराएको हिमाली साँस्कृतिक परिवारका कोषाध्यक्ष महादेव पोखरेलले जानकारी दिए । सोमवार वितरण खाद्यान्न राहत एक जना कलाकारलाई दुई हजार बराबरको सहयोग गरेको उनले बताए ।

कोरोना महामारीका कारण लामो लकडाउनले कलाकारहरु समस्यामा परेकाले क्लवको तर्फबाट कलाकारहरुलाई सहयोग गरेको र परिवारका कुनै कलाकारलाई आगामी दिनमा पनि समस्या परे हिमाली साँस्कृतिक परिवारले आभिभावकत्व प्रदान गर्ने अध्यक्ष मेनकाजी गुरुङले बताए । यसअघि हिमाली साँस्कृतिक परिवारले आइतवार कोरोना भाइरस नियन्त्रणका लागि गण्डकी प्रदेश सरकार र पोखरा महानगरपालिकालाई २० हजार एक रुपैया सहयोग गरेको थियो।