महामारीमा कहीँ कतै पूर्व तयारी हुँदैन । यो त आकस्मिक हुन्छ । यसरी नै आयो कोरोना महामारी । चीनको वुहान प्रान्तबाट सुरु भएको यसको संक्रमण नेपालमा आइपुग्ला भनेर कल्पनासम्म गरिएको थिएन । अन्तत हाम्रो मुलुक पनि त्यसबाट अछुतो रहेन । पहिलो चरणको महामारीभन्दा अहिले दोस्रो चरणको महामारी झनै डरलाग्दो छ ।

यसले धेरैको ज्यान लिइसकेको छ । जतिबेला चीनतिर यसले भयानक रुप लिएको थियो, त्यतिबेला कोरोना परीक्षण गर्ने पद्धति नेपालमा थिएन । चीनबाट आएका एक शंकास्पद व्यक्तिको स्वाब संकलन गरी सिंगापुर पठाउनु परेको थियो । तर समयले सिकायो । टेकु अस्पतालमा सबैभन्दा पहिला यसको सुरुआत गरियो । जुन लहर नेपालभर फैलियो । अहिले पिसिआर परीक्षण नहुने कुनै प्रदेश नै छैनन् । गण्डकीको अवस्था हेर्ने हो भने सरकारीस्तरमै ४ वटा ल्याब सञ्चालनमा आइसकेका छन् । निजीस्तरबाट पनि पिसिआर परीक्षण हुन थालेको छ । तनहुँको व्यास नगरपालिकाले पनि पिसिआर जडानको तयारी थालेको छ ।

पिसिआर मेसिन जडानमात्र ठूलो कुरा होइन । यो अवधिमा प्रदेशका २ बाहेक सबै जिल्ला अस्पतालमा अक्सिजन प्लान्ट जडान भइसकेको छ । पोखरामै रहेका २ ठूला उद्योगबाट पनि अक्सिजन उत्पादन भइरहेको छ । जसका कारण गण्डकीका बिरामीले अक्सिजनको अभाव भोग्नु परेको छैन । बरु यहाँबाट अरु प्रदेशमा अक्सिजन पठाइएको छ । जिल्ला अस्पतालमा आइसियु र भेन्टिलेटरको सुविधा पनि थप हुँदै गएको छ । ३ तहकै सरकारले स्वास्थ्यमा विशेष चासो दिएका काम गरिहेका छन् । अहिले कति पालिकाहरुले त खोप खरिदका लागि सरकारसँग अनुमति पनि मागिसकेका छन् । संघ सरकारले नै गर्नु पर्ने काममा पालिकाहरु अघि सर्नु कति उचित हो होइन भन्नेबारे पछि समीक्षा होला । कम्तीमा उनीहरुले त्यो आँट त गरे नि ।

गण्डकी प्रदेश सरकारले संघ सरकारसमेतको सहयोगमा पोखरामा संक्रामक तथा सरुवा रोग अस्पताल सञ्चालनमा ल्याएको छ । यसलाई सरकारको राम्रो उपलब्धि मान्नुपर्छ । अहिले त त्यहाँ आइसियुका शड्ढयासमेत राखिएको छ । मुख्यमन्त्री पृथ्वीसुब्बा गुरुङले अर्को भवन शिलान्यास पनि गरिसकेका छन् । प्रदेशको प्रयोगशाला पनि त्यहीँ बन्दै छ । प्रदेशको आफ्नै व्यवस्थित प्रयोगशाला नभएका बेला यो कदम सकारात्मक हो । यी सबै गतिविधि हेर्दा महसुस भएको छ कि आवश्यकता प¥यो भने बजेटको अभाव हुँदोरहनेछ । चाहिने त इच्छाशक्ति रहेछ । तर बनाउने भने सबैखालका संरचनाहरु सबैतिर बनाउन आवश्यक भने पर्दैन । जस्तै अहिले अक्सिजन प्लान्टको फेसन चलेको छ । सिलिन्डर पर्याप्त भए पनि ठूला सहरमा भएका उद्योगहरुलाई नै परिचालन गरेर आवश्यकता पूर्ति गर्न सकिन्छ । यस्ता विषयमा सरकार र निजी क्षेत्रको ध्यान जान जरुरी छ ।